Իսրայելի զինված ուժերն ուրբաթ գիշերը նոր ավիահարվածներ են հասցրել Սիրիայի Աս-Սուվեյդա նահանգին, որը, հիմնականում, դրուզներով է բնակեցված, հաղորդում է INTERFAX գործակալությունը՝ հղում անելով SANA լրատվականին։
Նշվում է, որ իսրայելական ինքնաթիռները ռմբակոծել են Աս-Սուվեյդա քաղաքի ծայրամասը։
Նախորդ օրը Սիրիայի կառավարական զորքերը լքել էին նահանգը, այնտեղ հրադադար էր սահմանվել, և օրենքն ու կարգուկանոնը պահպանելու վերահսկողությունը փոխանցվել էր հանձնաժողովին, որը ներառում է կառավարության պաշտոնյաներ և հոգևոր առաջնորդներ, հայտնում է լրատվականը։
Ավելի վաղ հաղորդվել էր, որ հուլիսի 14-ին քաղաքում կառավարական ուժերի և դրուզների միջև բախումների արդյունքում զոհվել է առնվազն 34 մարդ։
Ուրբաթ օրը Սիրիայի անցումային նախագահ Ահմեդ ալ-Շարաան հայտարարություն է տարածել, որում Աս-Սուվեյդայի դրուզ զինյալներին մեղադրել է հրադադարը խախտելու մեջ։ Նա նաև զգուշացրել է «Իսրայելի կողմից Սիրիայի ներքին գործերին շարունակական բացահայտ միջամտության մասին, որը միայն հանգեցնում է հետագա քաոսի և ավերածությունների՝ ավելի բարդացնելով իրավիճակը տարածաշրջանում»։
Իսրայելի պաշտպանության ուժերը հարվածներ էին հասցրել Սիրիայի գլխավոր շտաբի շենքին և Դամասկոսի նախագահական պալատին։
Իսրայելն ավելի վաղ հարվածներ էր հասցրել Սիրիայի հարավ-արևմուտքում գտնվող կառավարական զորքերին՝ հուլիսի 13-ին հիմնականում դրուզներով բնակեցված սիրիական Էս-Սուվեյդա նահանգում մարտերի սկսվելուց հետո:
2024 թվականի դեկտեմբերին Իսրայելի պաշտպանության բանակը Սիրիայում Բաշար Ասադի ռեժիմի անկման ֆոնին զորքեր էր տեղակայել Իսրայելի կողմից օկուպացված Գոլանի բարձունքների մոտ գտնվող բուֆերային գոտում, իսկ ավելի ուշ դուրս մղվել դրա սահմաններից։ Ավելի ուշ Իսրայելը պահանջել էր ապառազմականացնել Սիրիայի հարավային շրջանները։
2025 թվականի ապրիլին Իսրայելի կառավարությունը հաստատել էր Սիրիայի արևմուտքում ալավիների վրա մի շարք հարձակումներից հետո սիրիացի դրուզներին պաշտպանելու իր խոստումը։ Ապրիլի վերջին իսրայելցի զինվորականները հարվածներ էին հասցրել Սիրիայի կառավարական ուժերին Դամասկոսի շրջանում դրուզների և սուննիների միջև բախումների սկսվելուց հետո:
