Wizz Air ավիաընկերությունը հայտարարել է Աբու Դաբիում իր գործունեությունը դադարեցնելու մասին, հայտնում է Reuters-ը։
Ավիաընկերությունում նշել են, որ պատճառը Մերձավոր Արևելքում տիրող անկարգություններն են, որոնք գրեթե երկու տարվա ընթացքում ոչնչացրել են այդ շուկայում շահույթ ստանալու բոլոր հնարավորությունները:
Ընկերությունը հավելել է, որ գործունեության դադարեցումը նաև Արևելյան Եվրոպայի շուկայի վրա կենտրոնանալու նպատակով է։
ԱՄԷ-ում Հայաստանի դեսպանությունը հունիսի 25-ին հայտնել էր, որ Wizz Air-ը մինչև հունիսի 30-ը չեղարկել է Աբու Դաբիից Երևան չվերթերը՝ տարածաշրջանում ստեղծված իրավիճակի պատճառով։
ԱՄՆ-ն հունիսի 22-ի գիշերը հարվածներ էր հասցրել Իրանի երեք միջուկային օբյեկտի։ Հունիսի 23-ի ուշ երեկոյան Իրանը հրթիռներ էր արձակել Կատարում տեղակայված ամերիկյան ռազմաբազաների ուղղությամբ։
Հունիսի 24-ին ԱՄՆ նախագահ Դոնալդ Թրամփը հայտարարել էր, որ Իրանը կհամաձայնի դադարեցնել հակամարտությունը, և պատրաստ է Իսրայելին խաղաղության կոչով դիմել: ԱՄՆ նախագահն ընդգծել էր, որ եկել է խաղաղության ժամանակը։ Նույն օրը Թրամփը հայտնել էր, որ Իրանի և Իսրայելի միջև հրադադարն ուժի մեջ է մտել։
