Ֆրանսիան մտադիր է երկխոսություն սկսել ԵՄ անդամ պետությունների հետ՝ ֆրանսիական միջուկային զինանոցների օգնությամբ եվրոպական անվտանգությունն ամրապնդելու վերաբերյալ, ՏԱՍՍ-ի փոխանցմամբ՝ հայտարարել է Ֆրանսիայի նախագահ Էմանուել Մակրոնը երկրի զինվորականներին ուղղված իր ուղերձում։
«Մեր միջուկային զսպման միջոցների դերը կոլեկտիվ անվտանգության ապահովման գործում լիարժեք գնահատելու համար Զինված ուժերի նախարարին և Զինված ուժերի գլխավոր շտաբի պետին հանձնարարել եմ ռազմավարական երկխոսություն սկսել եվրոպացի գործընկերների հետ, որոնք պատրաստ են նման փոխազդեցության։ Այս թեմային կանդրադառնամ տարեվերջին՝ ավելի մանրամասն ներկայացնելով, թե ինչ առաջընթաց է գրանցվել»,- ասել է Ֆրանսիայի առաջնորդը։
Նա հիշեցրել է Ֆրանսիայի և Մեծ Բրիտանիայի միջև նախկինում կնքված համաձայնագիրը միջուկային զսպման ուժերի համակարգման վերաբերյալ, ինչպես նաև հայտարարել օգոստոսին կայանալիք ֆրանս-գերմանական պաշտպանության խորհրդից հետո նոր համատեղ որոշումների մասին։
«Մի քանի օրից նախատեսվում է Գերմանիայի և Մեծ Բրիտանիայի միջև հանդիպում։ Իսկ օգոստոսի վերջին կհանդիպենք մեր գերմանացի գործընկերների հետ պաշտպանության և անվտանգության հարցերով ֆրանս-գերմանական խորհրդում, որտեղ պետք է նոր որոշումներ կայացնենք»,- ընդգծել է Մակրոնը։
