Միլիարդատեր, ԱՄՆ կառավարության արդյունավետության վարչության (DOGE-խմբ.) նախկին ղեկավար Իլոն Մասկն ԱՄՆ նախագահ Դոնալդ Թրամփի նախընտրական քարոզարշավի ընթացքում թմրանյութեր է օգտագործել «ավելի հաճախ, քան նախկինում հայտնի էր», գրել է The New York Times-ը՝ հղում անելով իր աղբյուրներին։
Ըստ այդմ՝ Մասկը չափիս շատ է օգտագործել կետամին, չնայած նախկինում պնդում էր, թե այն ընդունում է ըստ բժշկի դեղատոմսի՝ երկու շաբաթը մեկ կամ ավելի քիչ։ Սակայն, ըստ ամերիկյան լրատվամիջոցի, հնարավոր է՝ նա կետամինն օգտագործել է ամեն օր և խառնել այլ նյութերի հետ, ինչի հետևանքով նրա մոտ սկսվել են միզապարկի հետ կապված առողջական խնդիրներ։
Բացի այդ, տեղեկություններ կան, որ Մասկն օգտագործել է նաև էքստազի և հալյուցինոգեն սունկ։ Հայտնի չէ՝ շարունակե՞լ է արդյոք նա թմրանյութերի օգտագործումն ԱՄՆ նախագահի վարչակազմում նշանակվելուց հետո։ Այնուամենայնիվ, աղբյուրները նշում են, որ նա տեղյակ էր իր ընկերությունում՝ SpaceX-ում նախատեսվող թմրանյութերի թեստերից և հնարավոր է՝ կարողացել է խուսափել դրանցից։
Մայիսի 30-ի մամուլի ասուլիսում Մասկին խնդրել էին մեկնաբանել այս հրապարակումը, ինչին ի պատասխան՝ նա հայտարարել էր, թե նամանտիպ տեղեկությունները կեղծ են։
Մայիսի 29-ին հայտնի է դարձել, որ Մասկը լքում է ԱՄՆ նախագահի վարչակազմը՝ իր ծախսերի կրճատման բարեփոխումների ձախողման և նախագահի հետ ունեցած տարաձայնությունների պատճառով։ Մասկն ընդգծել էր, որ ցանկանում է կենտրոնանալ իր բիզնեսի վրա, որն սկսել է մեծ վնասներ կրել միլիարդատիրոջ քաղաքական ակտիվության հետևանքով։
