Իսրայելի բանակը հարվածներ է հասցրել Գազայի հատվածին, որի հետևանքով զոհվել է առնվազն 40 մարդ, հայտնել է Business Standard-ը՝ Associated Press-ին հղումով։
Ըստ կայքի՝ 25 մարդ զոհվել է Դարաջ շրջանում որպես ապաստարան օգտագործվող դպրոցի շենքի վրա հարձակման ժամանակ։ Զոհերի թվում էին հայրը և նրա հինգ երեխաները։ Կան նաև վիրավորներ՝ ավելի քան 55 մարդ։ Ոչնչացվել են նաև շենքում գտնվող քաղաքացիների մի շարք անձնական իրեր։
Հարձակումը տեղի է ունեցել գիշերը, երբ մարդիկ քնած էին։ Իսրայելական կողմը հայտարարել է, որ դպրոցում տեղակայված էր պաղեստինյան ՀԱՄԱՍ խմբավորման հրամանատարական կետը։
Բացի այդ, Ղազա քաղաքի «Ալ-Շիֆա» հիվանդանոցի տվյալներով՝ իսրայելական ուժերը հարվածել են բնակելի շենքի։ Արդյունքում՝ մեկ ընտանիքից 15 մարդ զոհվել է, այդ թվում՝ հինգ կին և երկու երեխա։
Մայիսին Իսրայելն սկսել է նոր ցամաքային գործողություն՝ «Գեդեոնի կառքը» անվամբ։ Դրա նպատակն է ավելի խիստ վերահսկողություն հաստատել Գազայի հատվածի նկատմամբ և ոչնչացնել ՀԱՄԱՍ-ի հրամանատարական ենթակառուցվածքը։
Հունվարի 15-ին Իսրայելը և ՀԱՄԱՍ-ը փուլային համաձայնության էին եկել Գազայի հատվածում պատերազմը դադարեցնելու վերաբերյալ: Մարտի 18-ի լույս 19-ի գիշերն Իսրայելը վերսկսել էր հարվածները Գազայում։ Իսրայելի վարչապետ Բենիամին Նեթանյահուն հայտարարել էր, որ հարձակումները շարունակվել են՝ կապված պաղեստինյան շարժման կողմից հրադադարի ռեժիմի երկարաձգման և պատանդների ազատման ամերիկյան ծրագիրը մերժելու հետ:
Գազայում էսկալացիայի սկզբից ի վեր զոհերի թիվը հասել է 54 հազարի։
