Փարիզի արվարձանային Շատնե-Մալաբրի քաղաքի կենտրոնական ավագ դպրոցում, որը կրում է Դիմադրության հերոսներ Միսաք և Մելինե Մանուշյանների անունը, տեղի է ունեցել Հայաստանին նվիրված միջոցառում, հայտնել է Ֆրանսիայում Հայաստանի դեսպանատունը։
Հայաստանի օրվա շրջանակներում դպրոցի սաները հարգել են Մանուշյանի և նրա զինակիցների հիշատակը՝ հանդիսավոր բացելով դպրոցի սրահներում փակցված նրանց դիմանկարները և ընթերցելով հատվածներ նրանց վերջին նամակներից։
Դպրոցի նախասրահում բացվել է հայազգի լուսանկարիչ Լիդիա Կասպարյանի՝ Հայաստանին նվիրված ինքնատիպ լուսանկարներ ներառող ցուցադրությունը, որը մի քանի ամիս շարունակ կցուցադրվի դպրոցի նախասրահում՝ աշակերտներին հաղորդակից դարձնելով հայկական բնաշխարհին և մշակութային ինքնատիպ ժառանգությանը։
Դպրոցի տնօրենը և միջոցառման կազմակերպիչները՝ պատմության և փիլիսոփայության ուսուցիչները, ընդգծել են, որ 2024 թվականի աշնանից ի վեր, երբ հաստատությունը անվանակոչվել է Մանուշյանների անունով, զույգի հերոսական պատկերները, որոնք հանգչում են Պանթեոնում՝ Ֆրանսիայի մեծագույն գործիչների շարքում, աշակերտների համար դարձել են հայ և ֆրանսիացի ժողովուրդների բարեկամության խորհրդանիշ՝ նպաստելով Հայաստանի նկատմամբ հետաքրքրության աճին։
Միջոցառումն ավարտվել է «Աշխարհաքաղաքականությունը Հարավային Կովկասում» թեմայով կլոր սեղանով, որին մասնակցել են դեսպան Արման Խաչատրյանը, Ֆրանսիայի Սենատի փոխնախագահ Պիեռ Ուզուլիասը, Ֆրանսիայի ԶՈՒ պաշտոնաթող գեներալ Ալաարը, Ֆրանսիական-հայկական խորհուրդ ասոցիացիայի նախագահ Դանիել Քյուքջյանը։
Մանուշյանը ծնվել է 1906 թվականին Արևմտյան Հայաստանի Ադիյաման քաղաքում։ Նրա ծնողները մահացել էին 1915 թվականի Հայոց ցեղասպանության ժամանակ։ 1925 թվականին Մանուշյանը գաղթել էր Ֆրանսիա և ապրել Մարսելում և Փարիզում։ Գերմանիայի կողմից Ֆրանսիայի օկուպացումից հետո կնոջ՝ Մելինեի հետ մասնակցել էր ֆրանսիական Դիմադրության շարժմանը։ Մանուշյանի հրամանատարությամբ գործող խումբը գրեթե 30 հաջող հարձակում է իրականացրել գերմանական օկուպանտների վրա։ Մանուշյանը ձերբակալվել էր 1943 թվականի նոյեմբերին, իսկ 1944 թվականի փետրվարի 21-ին իր 21 ընկերների հետ մահապատժի էր ենթարկվել։
Մանուշյանի և զինակից ընկերների մահապատժի ութսունամյա տարելիցի օրը՝ փետրվարի 21-ին, նրա և կնոջ՝ Մելինեի աճյունը վերահուղարկավորել էին Փարիզի պանթեոնում:
