Հնդկաստանի փոքր մթերային խանութներն ու խոշոր առցանց նորաձևության վաճառքի տները բոյկոտում են թուրքական արտադրանքը՝ շոկոլադից, սուրճից, մուրաբայից ու կոսմետիկայից մինչև հագուստ։ Պատճառը Թուրքիայի աջակցությունն է Պակիստանին Հնդկաստանի հետ հակամարտության ընթացքում, ինչն առաջացրել է հնդկական հասարակության դժգոհությունը, գրում է Economictimes-ը:
Երկուշաբթի Հնդկաստանի սպառողական ապրանքների դիստրիբյուտորների համադաշնությունը (AICPDF), որն ապահովում է շուրջ 13 միլիոն մանրածախ խանութների մատակարարում, հայտարարել է թուրքական ծագում ունեցող բոլոր ապրանքների նկատմամբ «անժամկետ և ամբողջական բոյկոտի» մասին։ Սա կազդի նաև մաշկի խնամքի միջոցների վրա։
Թուրքիայի նախագահ Ռեջեփ Թայիփ Էրդողանը հրապարակավ աջակցություն էր հայտնել Պակիստանին՝ ի նշան համերաշխության։ Սա տեղի էր ունեցել, երբ Հնդկաստանը մայիսի 7-ից սկսել էր ռազմական հարվածներ իրականացնել՝ ի պատասխան իսլամիստ զինյալների կողմից Քաշմիրում իրականացված հարձակման, որի հետևանքով զոհվել էր 26 մարդ:
Սահմանային բախումները շարունակվել են չորս օր՝ մինչև հրադադարի հաստատումը։ Հնդկաստանի կառավարությունը, սակայն, պաշտոնապես չի պահանջել թուրքական ապրանքների բոյկոտ:
