ԱՄՆ նախագահ Դոնալդ Թրամփի վարչակազմը ոչ պաշտոնական ուղիներով Արևելյան Եվրոպայի երկրներին, այդ թվում՝ Մոլդովային և չճանաչված Կոսովոյին, առաջարկել է ընդունել ԱՄՆ-ից արտաքսված անօրինական միգրանտներին, հայտնել է The Wall Street Journal-ը։
Լրատվականի տեղեկությամբ՝ Վաշինգտոնն անօրինական ներգաղթյալների արտաքսման շուրջ բանակցություններ է վարում նաև աֆրիկյան չորս երկրների՝ Բենինի, Ռուանդայի, Լիբիայի և Էսվատինիի, ինչպես նաև Մոնղոլիայի հետ։ Սպիտակ տունը մտադիր է երկարաժամկետ համաձայնագրեր կնքել լատինաամերիկյան երկու երկրների՝ Հոնդուրասի և Կոստա Ռիկայի հետ։
Ամերիկյան վարչակազմն այս երկրներին առաջարկում է ֆինանսական աջակցություն և քաղաքական արտոնություններ՝ միգրացիոն ճգնաժամի լուծման հարցում օգնության դիմաց։ Խոսքը միգրանտների մասին է, որոնց երկրները հետաձգում կամ հրաժարվում են հետ ընդունել իրենց քաղաքացիներին։
Ինչպես նշում է WSJ-ն, Սպիտակ տունն արդեն փորձել է արտաքսման նմանատիպ մոդել Պանամայի հետ։ Փետրվարին մերձավորարևելյան մի քանի երկրների 100-ից ավելի քաղաքացիներ տեղափոխող ինքնաթիռը ժամանել էր Պանամա, որից հետո տեղական իշխանություններն սկսել են նրանց վերադարձնել հայրենիք։
