ԱՄՆ նախագահի հատուկ բանագնաց Սթիվ Ուիտկոֆը, խոսելով հակամարտությունների կարգավորմանը մասնակցելու Վաշինգտոնի մոտեցումների մասին, հիշատակել է հայ-ադրբեջանական հակամարտությունը։
Լրագրող Թաքեր Կարլսոնին տված հարցազրույցում, խոսելով Գազայի հատվածում հակամարտությանը երկխոսության միջոցով վերջ դնելու հնարավորության մասին, Ուիտկոֆը նշել է, որ Միացյալ Նահանգները չի մասնակցի հակամարտությունների կարգավորմանը՝ առանց միջնորդության արդյունավետության վստահության։
«Ինչո՞ւ պետք է նախագահին խորհուրդ տամ, որ երկխոսությամբ ինչ-որ բան ավարտենք, եթե մենք չկարողանանք այդքան արդյունավետ լինել: Վատ քաղաքական բաղադրատոմս է, եթե ես այս հարցով չզբաղվեմ, նման գնահատականներ չանեմ և նախագահին ասեմ, որ դա կարող ենք ավարտել երկխոսությամբ կամ ոչ։ Այդ հաշվարկները նույնն են լինելու իրանցիների, ռուսների ու ուկրաինացիների հետ, նույնը լինելու է Ադրբեջանի ու Հայաստանի պարագայում»,- ասել է նա։
Մարտի 16-ին ԱՄՆ ազգային անվտանգության հարցերով խորհրդական Մայք Ուոլցը հայտարարել էր, որ Հարավային Կովկասում հակամարտությունը պետք է ավարտվի, և Բաքվին կոչ էր արել ազատ արձակել գերիներին։ ԱՄՆ պետքարտուղար Մարկո Ռուբիոն խաղաղության պայմանագրի տեքստի շուրջ Երևանի և Բաքվի միջև բանակցությունների ավարտը համարել էր հակամարտության էջը շրջելու հնարավորություն՝ համահունչ ԱՄՆ նախագահ Դոնալդ Թրամփի «ավելի խաղաղ աշխարհի» տեսլականին։
