Թուրքիայում հազարավոր մարդիկ դուրս են եկել փողոցներ՝ դժգոհելով ընտրություններում նախագահ Ռեջեփ Թայիփ Էրդողանի հիմնական հակառակորդ, Ստամբուլի քաղաքապետ Էքրեմ Իմամօղլուի ձերբակալության դեմ։ Հաղորդվում է, որ ոստիկանությունը հատուկ միջոցներ է կիրառել ցուցարարներին ցրելու համար:
Ստամբուլում բողոքի ակցիաները հիմնականում ընթանում են քաղաքապետարանի, ոստիկանական բաժանմունքի ուղղությամբ, որտեղ Իմամօղլուին տարել էին նրա տունը խուզարկելուց հետո։ Ակցիաներ են ընթանում նաև համալսարանի մոտ, որը չեղարկել էր քաղաքական գործչի դիպլոմը նրա ձերբակալությունից մեկ օր առաջ։ Սա Իմամօղլուին զրկել էր նախագահական ընտրություններին մասնակցելու իրավունքից։
Ինչպես հաղորդում են BBC-ն և միջազգային այլ լրատվամիջոցներ, ոստիկանությունը հատուկ միջոցներ է կիրառել համալսարանի տարածքում հավաքված ուսանողների նկատմամբ։ Ընդդիմադիր Ժողովրդահանրապետական կուսակցության առաջնորդ Օզգյուր Օզելը քաղաքապետարանի մոտ դիմել է ցուցարարներին։ Նա Ստամբուլի քաղաքապետի ձերբակալությունն անվանել է հեղաշրջման փորձ։ Կուսակցությունը նախապես ծրագրել էր առաջիկա նախագահական ընտրություններում որպես թեկնածու առաջադրել Իմամօղլուին։
Չնայած Ստամբուլի սահմանված հանրահավաքների և ցույցերի արգելքին, բողոքի ցույցերը շարունակվում են ոչ միայն Ստամբուլում, այլև երկրի այլ քաղաքներում, այդ թվում՝ Անկարայում։ Իմամօղլուն ձերբակալվել է մարտի 19-ին։ Նա մեղադրվում է կոռուպցիայի և ահաբեկչական կազմակերպությունների հետ ենթադրյալ կապերի մեջ։ Ձերբակալությունից հետո Ստամբուլի ճանապարհները փակվել են, ցույցերն արգելվել են 4 օրով, ինչպես նաև սահմանափակվել է մուտքը X, Instagram, YouTube և TikTok սոցիալական ցանցեր։
