Սիրիայի նոր կառավարության մարտիկները գրոհել են երկրի ափամերձ երեք գյուղ՝ սպանելով տասնյակ տղամարդկանց՝ ի պատասխան պաշտոնանկ արված նախագահ Բաշար Ասադի կողմնակիցների կողմից կառավարական անվտանգության ուժերի վրա վերջին հարձակումների, հայտնում է AP News-ը:
Նշվում է, որ Միացյալ Թագավորությունում գործող Մարդու իրավունքների սիրիական դիտորդական կենտրոնի տվյալներով՝ մարտերի սկսվելուց ի վեր զոհվել է մոտ 200 մարդ:
Սիրիայում բախումներ և ցույցեր էին սկսվել մարտի 6-ին։ Մարտի 7-ին նոր իշխանությունները վերահսկողության տակ էին վերցրել Լաթաքիա քաղաքը՝ հեռացնելով Ասադի զինված կողմնակիցներին։
Սիրիայում զինված հակամարտությունն սկսել էր 2011 թվականից։ Զինադադարը խախտվել էր 2024-ի նոյեմբերի 27-ին, երբ սիրիական մի շարք խմբավորումների զինյալներ՝ «Հայաթ Թահրիր ալ-Շամ» իսլամիստական խմբավորման գլխավորությամբ, հարձակում էին սկսել երկրի հյուսիս-արևմուտքում կառավարական ուժերի դեմ: Նրանք մեկ շաբաթվա ընթացքում գրավել էին երկրի բոլոր խոշոր քաղաքները՝ Հալեպը, Համան, Հոմսը և Դամասկոսը: Ավելի ուշ՝ դեկտեմբերին, այս խմբերը ձևավորել էին նոր կառավարություն՝ ներառյալ նոր պաշտպանության նախարարությունը:
«Գանձասար» թերթի խմբագիր Զարմիկ Պողիկյանն Armenia Today-ին հայտնել էր, որ հայկական համայնքի նկատմամբ նոր իշխանությունների վերաբերմունքը շատ հարգալից է։
