ԱՄՆ նախագահ Դոնալդ Թրամփն արձագանքել է Ուկրաինայի նախագահ Վլադիմիր Զելենսկու այն հայտարարությանը, որ Ուկրաինայի և Ռուսաստանի միջև պատերազմին վերջ տալու գործարքը «դեռևս շատ-շատ հեռու է»։
«Սա ամենավատ հայտարարությունն է, որ կարող էր անել Զելենսկին, և Ամերիկան դեռ երկար չի համակերպվի դրա հետ»,- Truth Social-ում գրել է Թրամփը։
Նրա խոսքով՝ Զելենսկին խաղաղություն չի ցանկանում, քանի դեռ ունի ԱՄՆ աջակցությունը։ «Դա այն է, ինչ ես ասում էի, այս տղան չի ցանկանում, որ խաղաղություն լինի, քանի դեռ նա ունի Ամերիկայի աջակցությունը։ Եվ Եվրոպան, Զելենսկու հետ հանդիպման ժամանակ, կտրականապես հայտարարել է, որ իրենք չեն կարող անել այդ աշխատանքը առանց ԱՄՆ-ի։ Ինչի՞ մասին են նրանք մտածում»,- նշել է ԱՄՆ նախագահը։
Զելենսկին նաև հայտարարել էր, որ ակնկալում է շարունակել ստանալ ամերիկյան աջակցությունը՝ չնայած Թրամփի հետ իր վերջին լարված հարաբերություններին։
«Կարծում եմ, որ մեր հարաբերությունները (ԱՄՆ-ի հետ) կշարունակվեն, քանի որ դա ավելին է, քան պատահական հարաբերություններ», – ասել է Զելենսկին։
Ռուս-ուկրաինական կոնֆլիկտի կարգավորման գործընթացը մեկնարկել էր ՌԴ նախագահ Վլադիմիր Պուտինի և Թրամփի միջև փետրվարի 12-ին կայացած հեռախոսազրույցից հետո։ Փետրվարի 15-ին Սաուդյան Արաբիան պատրաստակամություն էր հայտնել երկրում ընդունել Ռուսաստանի և ԱՄՆ նախագահների հանդիպումը։ Փետրվարի 18-ին Սաուդյան Արաբիայի մայրաքաղաք Էր Ռիադում մեկնարկել էին Ուկրաինայի հարցով Ռուսաստանի և ԱՄՆ պատվիրակությունների բանակցությունները, որոնք տևել էին ավելի քան 4 ժամ։ Ավելի ուշ ԱՄՆ պետքարտուղարությունն Ուկրաինայի հարցով ՌԴ-ի հետ ձեռք բերված 4 պայմանավորվածություն էր հրապարակել։
Փետրվարի 18-ին ԶԼՄ-ները հայտնել էին, որ ԱՄՆ-ն ցանկանում է գրեթե լիակատար վերահսկողություն ունենալ ուկրաինական ռեսուրսների և դրանցից ստացված եկամուտների կեսի վրա։
Փետրվարի 28-ին Ուկրաինայի նախագահ Վլադիմիր Զելենսկին ժամանել էր Վաշինգտոն՝ հանքարդյունաբերության գործարք կնքելու համար։ Նրա հանդիպումը Թրամփի հետ սկսվել էր վիճաբանությամբ՝ հենց լրատվամիջոցների առջև, և գործարքը ձախողվել էր:
Կարդացեք նաև`
Ինչպե՞ս են վատթարացել ԱՄՆ-ի և Ուկրաինայի նախագահների հարաբերությունները:
