Գազայի հատվածում հրադադարի համաձայնագրի երկրորդ փուլի շուրջ բանակցությունները կսկսվեն հաջորդ շաբաթվա սկզբին, հայտնում է ՏԱՍՍ-ը՝ հղում անելով պաղեստինյան ՀԱՄԱՍ շարժման քաղբյուրոյի ղեկավարության մամուլի քարտուղար Թահեր ան-Նունուին։
Ան-Նունուն նշել է, որ համաձայնագրի առաջին փուլի իրականացման շրջանակներում միջնորդները «խոստացել են ապահովել ավելի շատ վրանների և կցասայլերի ներմուծում Գազա»՝ պաղեստինցիների ժամանակավոր կացարանի համար, ինչպես նաև ծանր տեխնիկա՝ փլատակների մաքրման համար:
Ավելի վաղ Գազայի իշխանությունները հայտարարել էին, որ մարդասիրական օգնությունը դեռ չի մտել գոտի, սակայն դա պետք է տեղի ունենա «մոտակա մի քանի ժամվա ընթացքում»։
Հունվարի 15-ին Իսրայելը և ՀԱՄԱՍ-ը փուլային համաձայնության էին եկել Գազայի հատվածում պատերազմը դադարեցնելու վերաբերյալ: Համաձայնագիրը նախատեսում էր հրադադարի նախնական փուլ 6 շաբաթ ժամկետով և ներառում էր Գազայի հատվածից իսրայելական զորքերի աստիճանական դուրսբերում, իսրայելցի պատանդների ազատ արձակում՝ Իսրայելի կողմից պահվող պաղեստինցի բանտարկյալների դիմաց: Պայմանավորվածության առաջին փուլը նախատեսում էր 33 իսրայելցի պատանդների ազատում, ներառյալ՝ բոլոր կանանց, երեխաներին և 50 տարեկանից բարձր տղամարդկանց: Այս փուլում արդեն ազատ է արձակվել 21 պատանդ։
Փետրվարի 10-ին ՀԱՄԱՍ-ը հայտարարել էր, որ Իսրայելի կողմից հրադադարի մասին համաձայնագրի խախտումների պատճառով հետաձգել է Գազայի հատվածում պահվող պատանդների նոր խմբի ազատման գործընթացը: Դրանից հետո ԱՄՆ նախագահ Դոնալդ Թրամփը պահանջել էր մինչև փետրվարի 15-ի կեսօր ազատ արձակել բոլոր պահվող պատանդներին՝ հայտարարելով, որ եթե պահանջը չկատարվի, ապա «դժոխք կբռնկվի»։
