Մեքսիկայի իշխանությունները դիտարկում են Google-ին դատի տալու հարցը՝ Google Maps-ում Մեքսիկական ծոցն Ամերիկյան ծոց անվանափոխելու համար, հայտնում է ՏԱՍՍ-ը՝ հղում անելով նախագահ Կլաուդիա Շեյնբաումին։
«Եթե նրանք (Google ընկերությունը) շարունակեն պնդել, մտածում ենք դատական հայց ներկայացնելու մասին, քանի որ նրանք Մեքսիկական ծոցն անվանում են Ամերիկյան ծոց Մեքսիկայի տարածքում»,- նշել է Շեյնբաումը։
Նա հայտնել է, որ Մեքսիկայի իշխանություններն ստացել են ամերիկյան կորպորացիային ավելի վաղ ուղարկված նամակի պատասխանը, որում հանրապետության կառավարությունը Google-ին բացատրել է Մեքսիկական ծոցն Ամերիկյան ծոց վերանվանելու քայլի սխալ լինելը։
Ավելի վաղ Google կորպորացիան սկսել էր Մեքսիկական ծոցը վերանվանել Ամերիկյան ծոց: Նոր անվանումն արդեն ցուցադրված է ԱՄՆ-ի Google Maps-ում: Այնուամենայնիվ, Մեքսիկայում ծառայության օգտվողները դեռ կտեսնեն ծովածոցի հին անվանումը, մինչդեռ մնացած բոլոր երկրներում, բացառությամբ ԱՄՆ-ի, միաժամանակ կցուցադրվեն ինչպես հին, այնպես էլ նոր անունները:
ԱՄՆ նախագահ Դոնալդ Թրամփը հունվարի վերջին իր երդմնակալության արարողությունից անմիջապես հետո հրաման էր ստորագրել Մեքսիկական ծոցն Ամերիկյան ծոց վերանվանելու մասին: Որպես փաստարկ՝ Սպիտակ տան ղեկավարը նշել էր այն փաստը, որ սա «աշխարհի ամենամեծ ծովածոցն է», որը «առանցքային նշանակություն ունի ամերիկյան տնտեսության համար»։ ՄԱԿ-ն այս կապակցությամբ հայտարարել էր, որ աշխարհագրական օբյեկտների անվանափոխումը որևէ առանձին պետության իրավասությունը չէ։
