Իսրայելի պաշտպանության բանակի (ՑԱԽԱԼ) գլխավոր շտաբի պետ Հերցի Հալևին հայտարարել է, որ հրաժարական կտա 2025 թվականի մարտի 6-ին, տեղեկացնում է «ՌԻԱ Նովոստին»:
Իր հեռանալու պատճառը Հալևին համարում է 2023 թվականի հոկտեմբերի 7-ին ՑԱԽԱԼ-ի ձախողումը։
«Այսօր Պաշտպանության նախարարին հայտնել եմ, որ Իսրայելի պաշտպանության բանակի ձախողման համար իմ պատասխանատվությունն ընդունելու պատճառով, ինչպես նաև հաշվի առնելով բանակի ձեռքբերումները և պատանդներին ազատելու գործարքի իրականացումը, խնդրում եմ իմ լիազորությունների ժամկետն ավարտել 2025թ. մարտի 6-ին»,- ասել է նա:
Իր հայտարարության մեջ ՑԱԽԱԼ-ի գլխավոր շտաբի պետը հստակեցրել է, որ մինչև հրաժարականը նախատեսում է ամրապնդել բանակի պատրաստվածությունն անվտանգության ոլորտային խնդիրներին, որից հետո հրամանատարությունը որակապես և հիմնովին կփոխանցի իրավահաջորդին: Հալևին հրաժարականի մասին իր դիմումն ուղարկել է նաև Իսրայելի վարչապետ Բենյամին Նեթանյահուին:
2023-ի հոկտեմբերի 7-ի առավոտյան պաղեստինյան իսլամիստական ՀԱՄԱՍ շարժումը հայտարարել էր Իսրայելի դեմ «Ալ-Աքսա ջրհեղեղ» ռազմական գործողության մեկնարկի մասին։ Իսրայելական բանակն ի պատասխան հայտնել էր Գազայի հատվածում «Երկաթե սրեր» հակաահաբեկչական գործողության մեկնարկի մասին։ Հունվարի 17-ին Իսրայելը և ՀԱՄԱՍ-ը Գազայի հատվածում մարտերը դադարեցնելու վերաբերյալ հրադադարի պայմանագիր էին ստորագրել։
ՀԱՄԱՍ-ը հաստատել էր, որ Իսրայելի հետ Գազայի հատվածում հրադադարի շուրջ համաձայնության է եկել։ Կատարի վարչապետ Մուհամեդ բեն Աբդուլ Ռահման Ալ Թանին հայտարարել էր, որ համաձայնագիրն ուժի մեջ կմտնի հունվարի 19-ից։ Նա հաստատել էր, որ ՀԱՄԱՍ-ն Իսրայելի հետ գործարքի առաջին փուլում ազատ կարձակի 33 պատանդի։ Հունվարի 19-ին Նեթանյահուի գրասենյակը հայտարարել էր, որ Գազայի հատվածում հրադադարի ռեժիմն առաջին փուլում ուժի մեջ է մտնելու ժամը 11:15-ին։
Իսրայելը հայտնել էր, որ ՀԱՄԱՍ-ի հարձակման հետևանքով երկրում զոհվել էր շուրջ 1200 մարդ, ավելի քան 240-ը պատանդ էին մնացել: 2023 թվականի նոյեմբերի վերջին ժամանակավոր զինադադարի ժամանակ ավելի քան 100 պատանդ էր ազատվել։ Գազայի առողջապահության նախարարության տվյալներով՝ 2025 թվականի հունվարի 15-ի դրությամբ Գազայի հատվածում զոհերի թիվը հասել էր 46 707-ի, վիրավորվել էր 110 265 մարդ։
