Սիերա Լեոնեում գրանցվել է «կապիկի ծաղիկով» վարակվելու առաջին դեպքը, հայտնում է «ՌԻԱ Նովոստի»-ն՝ հղում անելով տեղական Awoko թերթին։
«Սիերա Լեոնեն հաստատել է mpox-ի (կապիկի ծաղիկ – խմբ.) առաջին դեպքը, որը վիրուսային հիվանդություն է և հայտարարված է որպես համաշխարհային առողջության համար սպառնալիք»,- ասվում է հաղորդագրության մեջ։
Նշվում է, որ խոսքը 27-ամյա երիտասարդի մասին է։
«Կապիկի ծաղիկը» հազվագյուտ վիրուսային հիվանդություն է, որը պոտենցիալ վտանգավոր է թուլացած իմունային համակարգ ունեցող մարդկանց համար: Վարակն ուղեկցվում է ջերմությամբ, թունավորմամբ, ավշային հանգույցների մեծացմամբ և ցանի հետագա տարածմամբ՝ նախ բծերի տեսքով, որոնք վերածվում են բշտիկների, բացվելուց հետո ձևավորվում են խոցեր։ Թեթև դեպքերում հիվանդությունը սովորաբար անցնում է ինքնուրույն և տևում է 14-21 օր:
Օգոստոսի 22-ին ՀՀ սննդամթերքի անվտանգության տեսչական մարմինը «կապիկի ծաղիկ» հիվանդության կանխարգելման նպատակով արգելել էր կրծողների և պրիմատների ներմուծումը Հայաստան։
Օգոստոսի 16-ին ՀՀ առողջապահության նախարարությունը հայտնել էր, որ Հայաստանում «կապիկի ծաղիկ» հիվանդության դեպք չի գրանցվել, իսկ ներթափանցման և հետագայում տարածման ռիսկը ցածր է։
ԱՆ-ից տեղեկացրել էին, որը հիվանդությունը փոխանցվում է կա՛մ վարակված կենդանու կծելու հետևանքով, կա՛մ վայրի կենդանու միսն ու մորթին օգտագործելուց, հազվադեպ՝ մարդու կամ վիրուսով բաղարկված նյութի հետ շփումից: Վիրուսն օրգանիզմ է թափանցում վնասված մաշկի, շնչառական ուղիների կամ լորձաթաղանթների (աչք, քիթ, բերան, սեռական ուղի) միջոցով:
