Սիրիայում զինված խմբավորումները համաձայնել են միանալ Պաշտպանության նախարարությանը

Սիրիայի զինված ուժերը որոշել են ինքնալուծարվել և դառնալ երկրի նոր Պաշտպանության նախարարության մաս, հայտնում է ՏԱՍՍ-ը՝ հղում անելով սիրիական SANA-ին։

Ըստ գործակալության՝ համապատասխան պայմանավորվածությունը ձեռք է բերվել Սիրիայի նախկին նախագահ Բաշար ալ-Ասադի կողմից վերահսկվող զինված ուժերի հրամանատարների հետ Սիրիայի նոր իշխանությունների առաջնորդ Ահմեդ ալ-Շարաայի (հայտնի է Աբու Մուհամմեդ ալ-Ջուլանի մականունով) հանդիպման ժամանակ։

Դեկտեմբերի 22-ին ալ-Շարաան հայտարարել էր, որ զինված խմբավորումները Սիրիայում կկարողանան գոյություն ունենալ միայն երկրի Պաշտպանության նախարարության հովանու ներքո: Նրա խոսքով՝ խմբավորման հրամանատարների մեծ մասը համաձայնել է այս պայմանին նույնիսկ Ասադի դեմ ռազմական գործողության մեկնարկից առաջ։

Սիրիայի նոր իշխանությունների առաջնորդն այնուհետև ընդգծել է, որ «թույլ չի տա զենքի անվերահսկելի շրջանառություն» երկրում, քանի որ «հեղափոխության փուլում կարող են լինել տարբեր զինված խմբավորումներ, բայց երբ խոսքը գնում է պետության մասին, նրանց գործունեությունը պետք է կանոնակարգված լինի»:

Սիրիայում զինված հակամարտությունն սկսել էր 2011 թվականից։ Զինադադարը խախտվել էր 2024-ի նոյեմբերի 27-ին, երբ սիրիական մի շարք խմբավորումների զինյալներ՝ «Հայաթ Թահրիր ալ-Շամ» իսլամիստական ​​խմբավորման գլխավորությամբ, հարձակում էին սկսել երկրի հյուսիս-արևմուտքում կառավարական ուժերի դեմ: Նրանք գրավել էին Հալեպը, Համան, Դեր Զորը, Դերաան և Հոմսը։ 

Դեկտեմբերի 8-ին զինյալ ահաբեկիչներն ուղիղ եթերում հայտարարել էին, որ վերահսկողություն են հաստատել Սիրիայի նկատմամբ։ Նույն օրը ԶԼՄ-ները տեղեկացրել էին, որ Սիրիայի նախագահ Բաշար ալ-Ասադը լքել է Սիրիան։ ՌԴ ԱԳՆ-ն ավելի ուշ հայտարարել էր, որ Սիրիայի նախագահը թողել է պաշտոնը և լքել երկիրը։ «ՏԱՍՍ»-ն ավելի ուշ գրել էր, որ Ասադն ու նրա ընտանիքի անդամները ժամանել են Մոսկվա, ՌԴ-ն նրանց ապաստան է տրամադրել։