Եվրոպական խորհուրդը որոշել է ընդլայնել ԵՄ դիտորդական առաքելությունը Հայաստանում։ Հունվարի 16-ին ընդունված որոշման տեքստը հրապարակվել է ԵՄ կայքում։
Փաստաթղթում նշվում է, որ 2023 թվականի դեկտեմբերի 5-ին ԵՄ քաղաքական և անվտանգության կոմիտեն փոփոխել է առաքելության գործառնական պլանը և համաձայնել է իր ռեսուրսների ավելացման անհրաժեշտությանը։
Ելնելով դրանից՝ ԵՄ խորհուրդը համապատասխան փոփոխություններ է կատարել 2023 թվականի հունվարի 23-ի որոշման մեջ՝ ԵՄ դիտորդական առաքելություն ստեղծելու մասին։
Դեկտեմբերի 11-ին ԵՄ դիվանագիտության ղեկավար Ժոզեպ Բորելը դաշինքի ԱԳ նախարարների խորհրդի նիստից հետո հայտարարել էր, որ Եվրամիությունը որոշել է Հայաստանում իր դիտորդական առաքելության թիվը 138-ից հասցնել 209-ի։
Փետրվարի 20-ին Եվրամիությունը մեկնարկել էր քաղաքացիական առաքելությունը Հայաստանում (EUMA)՝ Միասնական անվտանգության և պաշտպանության քաղաքականության շրջանակներում։ Առաքելության անձնակազմը կազմում էր մոտ 100 մարդ, այդ թվում՝ 50 անզեն դիտորդներ։ Առաքելության շտաբը գտնվում է Եղեգնաձորում և ունի վեց օպերատիվ բազա և կապի փոքր գրասենյակ Երևանում:
