Ռուսաստանցի թենիսիստ Կարեն Խաչանովը (աշխարհի 20-րդ ռակետ) դուրս է եկել Ուիմբլդոն 2025-ի քառորդ եզրափակիչ։
Չորրորդ շրջանի խաղում նա վստահ հաղթանակ է տարել լեհ թենիսիստ Կամիլ Մայխշակի (ATP վարկանիշում 109-րդ տեղ) նկատմամբ՝ 6:4, 6:2, 6:3 հաշվով, հաղորդում է Wimbledon.com-ը։
Պայքարը տևել է 1 ժամ 47 րոպե։ Խաչանովը 10 էյս է կատարել, որևէ կրկնակի սխալ չի թույլ տվել և իրացրել է 10 բրեյք-փոյնթից 6-ը։
Հաջորդ փուլում Խաչանովը կխաղա ամերիկացի Թեյլոր Ֆրիցի դեմ, ով նախորդ փուլում հաղթել էր ավստրալացի Ջորդան Թոմփսոնին։ Հաղթանակի դեպքում Խաչանովը իր կարիերայում առաջին անգամ կհասնի «Մեծ սաղավարտի» կիսաեզրափակիչ։
Խաղին տրիբունաներից հետևում էր թենիսիստի հայրը՝ Աբգար Խաչանովը, որը մասնագիտությամբ բժիշկ է և նախկինում զբաղվել է վոլեյբոլով։
Խաղից հետո Խաչանովը Championat.com-ի թղթակցի հետ կիսվել է տպավորություններով՝ նշելով, որ գոհ է իր խաղից․
«Բացարձակ անկեղծությամբ կարող եմ ասել՝ ես հիանալի թենիս եմ խաղացել, առնվազն՝ իմ տեսանկյունից։ 2023 թվականի խոտածածկ մրցաշրջանը բաց թողեցի վնասվածքի պատճառով և այն ժամանակ մտածում էի՝ գուցե էլ երբեք չվերադառնամ խոտի վրա խաղալու։ Բայց այս տարի ամեն ինչ այլ է։ Ես կրկին վայելում եմ խաղը։ Անսահման երջանիկ եմ, որ վերադարձել եմ լավագույն ութնյակ և, իհարկե, ուզում եմ ևս մեկ քայլ առաջ անել», – ասել է թենիսիստը:
