Ամերիկացի հանրահայտ փոփ երգչուհի Ջենիֆեր Լոպեսը Հայաստանից իր հետ 19-րդ դարի կուժ է տարել, գրել է «Նարեկածին. ազգային զարդերի վերածնունդ» ապրանքանիշը Ֆեյսբուքում։
«Օրեր առաջ համագործակցության առաջարկ ստացանք seven_visions_resort-ից, որի շրջանակում նախատեսվում էր երգչուհուն հենց իր սենյակում նվիրել իրական հայկական զարդեր՝ հնամենի երկրի մշակույթը ՃԻՇՏ ներկայացնելու համար: Մեր թիմը շատ արագ արձագանքեց առաջարկին և հաշված ժամերի ընթացքում վարպետ Մհերը պատրաստեց Վան-Վասպուրականի շրջանի ԱԶԳԱՅԻՆ վզնոցն ու օղերը՝ համեմված Սյունիքի (Զանգեզուր) նուշերով:
Գիշերը՝ մինչ հյուրերի ժամանումը, սենյակում դրվեցին Թուֆենկյան ընկերության կողմից նվիրված գորգը և զարդի ճիշտ ու գեղագիտական ներկայացման համար ընտրված 19-րդ դարի Վանի կուժը: Իհարկե, երգչուհին շատ սիրեց ու գնահատեց նվերները, և հետո՝ նրա մեկնումից ժամեր անց պարզ դարձավ նաև, որ իր հետ տարել է ոչ միայն զարդերն ու գորգը, այլ նաև Վանա ԿՈՒԺԸ…», – հայտնել են ապրանքանիշի էջից:
«Նարեկածին»-ը հավելել է, որ չնայած զարմացած են, նաև ուրախ են, որ «երգչուհին գնահատել է իր հայկական անկյունը և իրավացիորեն այն ամբողջական նվեր ընկալելով՝ տարել իր հետ»:
