Վարորդական վկայականները կեղծելու մասին ՀՀ վարչապետ Նիկոլ Փաշինյանի հայտարարություններից հետո պարեկները ՀՀ ճանապարհներին ստուգումներ են իրականացրել, գրել է «Հրապարակ» թերթը՝ վկայակոչելով իր աղբյուրներին։
Լրատվականի համաձայն՝ պարեկային ծառայության աշխատակիցները կանգնեցրել են վարորդներին, ստուգել նրանց վկայականները և տուգանել աննշան խախտումների համար։
«Նմանատիպ գործողություններ են իրականացվել նաև մարզերում։ Ըստ տեղեկության՝ Արարատ քաղաքում, որտեղ մշտապես 1-2 պարեկային մեքենա է հերթապահում, երեկ 5-6-ն էին»,- գրում է կայքը։
Թերթը հավելել է, որ խստացվել է նաև վարորդական իրավունքի քննությունների հանձնումը, անկախ նրանից՝ թեկնածուն պատրա՞ստ է, թե՞ ոչ։
Ապրիլի 3-ին Փաշինյանը կառավարության նիստում ասել էր, որ վարորդական վկայականները Հայաստանում ամենուր կեղծ են։ Նա խոստովանել էր, որ ինքը վարորդական իրավունք է ստացել առանց քննություն հանձնելու, քանի որ «հայտնի լրագրող էր»։
