Լոս Անջելեսում Հայաստանի հյուպատոսության մոտ Հայ երիտասարդական ֆեդերացիան հանրահավաք է անցկացրել՝ ընդդեմ Սահմանադրությունը փոխելու ՀՀ վարչապետ Նիկոլ Փաշինյանի ծրագրերի։
«Մենք՝ որպես հայ ժողովուրդ և հայ երիտասարդություն, մերժում ենք ձեր ընկերներ Ալիևի և Էրդողանի պահանջով ցանկացած օրինական ազգային փաստաթուղթ փոխելու և Արցախը՝ որպես մեր հայրենիքի անբաժանելի մաս ջնջելու կոչը»,- ասել են ցուցարարները։
Նրանք վանկարկել են՝ «Արցախը կենդանի է» և «Արցախը Հայաստան է»։ Ցուցարարներն ընդգծել են Հայաստանի վարչապետի հայտարարությունների նմանությունն Ադրբեջանի նախագահ Իլհամ Ալիևի, ադրբեջանցի պատգամավորների և Թուրքիայի նախագահ Ռեջեփ Թայիփ Էրդողանի պահանջներին։
«Հայ ազգի ճակատագիրը ժողովրդի իշխանության մեջ է, այլ ոչ թե իշխանության մեջ գտնվող մարդկանց ձեռքում»,- եզրափակել են ակտիվիստները։
Փաշինյանը հունվարի 18-ին հայտարարել էր, որ Հայաստանին պետք է նոր Սահմանադրություն՝ գործող խորհրդարանական կառավարման ձևի պահպանմամբ։ ԱԳ նախարար Արարատ Միրզոյանը հունվարի 24-ին ասել էր, որ Բաքուն Հայաստանի Սահմանադրության մեջ Անկախության հռչակագրի դրույթը խնդիր է համարում: Ադրբեջանի ԱԳՆ-ն փետրվարի 19-ին Հայաստանից պահանջել էր Սահմանադրությունից և օրենսդրական ակտերից հանել «Ադրբեջանի տարածքային ամբողջականության և ինքնիշխանության նկատմամբ արտացոլված պահանջները»։
Armenia Today-ը երևանցիների շրջանում հարցում էր անցկացրել՝ պարզելու, թե արդյոք նրանք համաձա՞յն են Հայաստանի Սահմանադրությունը փոխելու Բաքվի պահանջին։ Մանրամասները՝ տեսանյութում։
