«Արցախը լքված չի լինելու, Արցախը մենակ չէ, մենք մոտ ենք Արցախին, մենք Արցախն ենք»։
Նման կարգախոսով նախօրեին Փարիզում տեղի է ունեցել Ֆրանսիայի հայերի հանրահավաքը Ադրբեջանի դեսպանատան դիմաց՝ ի պաշտպանություն Արցախի։ Այս մասին ֆեյսբուքյան իր էջում տեսանյութ է հրապարակել Արցախի արտաքին գործերի նախարարի օգնական Լիլիթ Ասրյանը։
Ակցիայի ընթացքում հնչել է Արցախի Հանրապետության օրհներգը։ Հանրահավաքին ելույթ է ունեցել Ֆրանսիա-Արցախ բարեկամության շրջանակի նախագահ, Ֆրանսիայի խորհրդարանի պատգամավոր Ֆրանսուա Պուպոն։ Իր ելույթում նա ընդգծել է, որ Արցախի հանձնումն Ադրբեջանին հղի է Հայաստանի պետականությունը կորցնելու սպառնալիքով, և կոչ է արել Ֆրանսիայի իշխանություններին ճանաչել Արցախի անկախությունը։
Նշենք, որ Ֆրանսիա-Արցախ Բարեկամության շրջանակը կազմավորվել է 2013 թվականի մարտի 19-ին, որի կազմում ընդգրկված են քաղաքական գործիչներ, Ազգային ժողովի պատգամավորներ և ֆրանսիացի սենատորներ։
