Արցախում բռնկված հրդեհը հասել է բնակավայրեր, Ադրբեջանը կոնկրետ քայլեր չի ձեռնարկում այն մարելու ուղղությամբ, հայտնել է Արցախի մշակույթի նախկին նախարար, Արցախի բռնազավթված տարածքներում մշակութային ժառանգության պաշտպանության հանրային խորհրդի նախագահ Սերգեյ Շահվերդյանը։
Ըստ ադրբեջանական ԶԼՄ-ների՝ Արցախի արևելյան սահմանի ողջ երկայնքով՝ Ջրականից մինչև Թալիշ, ավելի քան 200 կմ տարածքում, հրդեհաշիջման աշխատանքներին Ադրբեջանը ներգրավվել է ընդամենը 620 մարդ։
«3 մարդ 1 կմ տարածքում: Հիմա հասկանալի է, թե ինչու օկուպացիոն վարչակազմը ոչ մի կերպ «չի կարող» մարել հրդեհները։ Կամ գուցե պարզապես չի ուզում։ Սոցիալական ցանցերից ստացված կադրերը ցույց են տալիս օկուպացիոն վարչակազմի կողմից ձեռնարկված միջոցների բացարձակ անարդյունավետությունը (կամ այդպիսի ցանկության բացակայությունը)»,- գրել է Շահվերդյանը:
Նա նշել է, որ դատելով ադրբեջանական տիրույթում տարածված նկարներից՝ հրդեհը հասել է Ասկերանի շրջանի Նախիջևանիկ գյուղ։
Նախկին նախարարը Հայաստանի և Արցախի իշխանություններին, հասարակական կազմակերպություններին, բնապահպաններին կոչ է արել անհապաղ բարձրացնել բնության, նյութական արժեքների և մշակութային ժառանգության պաշտպանության, բռնազավթված տարածքներում էկոլոգիական աղետի կանխարգելման և հետևանքների համար Ադրբեջանին պատասխանատվության ենթարկելու հարցը:
Հուլիսի 23-ին ադրբեջանական ԶԼՄ-ները հայտնել էին Արցախի մի շարք շրջաններում բռնկված հրդեհների մասին։
