Ադրբեջանական լրատվամիջոցները հայտնել են Բաքվում կայացած «դատական» նիստում Արցախի նախկին նախագահ Արայիկ Հարությունյանի և Արցախի պաշտպանության նախկին նախարար Լևոն Մնացականյանի հայտարարությունների մասին։
Ըստ նրանց, Հարությունյանը հայտարարել է, որ ինքը «ոչ մի լիազորություն չի ունեցել» Արցախի ՊԲ-ի նկատմամբ, և որ բանակի հրամանատարը ենթարկվում էր Հայաստանի զինված ուժերի գլխավոր շտաբի պետին։
«Ես չեմ նշանակել և չեմ ազատել զինվորական հրամանատարությանը, քանի որ չունեի դրա իրավասությունը», – ասվում է Հարությունյանին վերագրվող հայտարարության մեջ։
Ըստ մամուլի հրապարակումների՝ նախկին նախագահը հայտարարել է, որ 2020 թվականի պատերազմի ժամանակ Հայաստանի զինված ուժերի գլխավոր շտաբի պետ Օնիկ Գասպարյանն ասել է, որ «ադրբեջանական օդանավակայանները մեր հիմնական թիրախն են, և մենք պետք է ոչնչացնենք դրանք»։
Նախկին նախագահը, ըստ ադրբեջանական ԶԼՄ-ների, ասել է, որ 2020 թվականի հունիսին Երևանում կայացած Հայաստանի և Արցախի Անվտանգության խորհուրդների նիստի ժամանակ «պարզվել է, որ Հայաստանը պատրաստ չէ պատերազմի»։
Հարությունյանը նաև նշել է, որ ինքը 2020 թվականի հոկտեմբերի 18-ին Արցախի նախկին նախագահներ Բակո Սահակյանի և Արկադի Ղուկասյանի հետ հանդիպումից հետո ՀՀ վարչապետ Նիկոլ Փաշինյանին պատրաստակամություն է հայտնել պատերազմը դադարեցնելու մասին նամակ գրել Ադրբեջանի նախագահին, սակայն հոկտեմբերի 19-ին Երևանում, այդ թվում՝ ընդդիմության հետ հանդիպումներից հետո, վարչապետը շարունակել է պատերազմը։
Ըստ տեղական լրատվամիջոցների, Արցախի պաշտպանության նախկին նախարար Լևոն Մնացականյանը հայտարարել է, որ 2020 թվականի սեպտեմբերի 20-ին «գաղտնի որոշում է կայացվել»։ Հաղորդվում է նաև, որ նա հայտարարել է, թե իբր «Հայաստանի կանոնավոր բանակի կազմում մասնակցել է Ադրբեջանի դեմ պատերազմին»։
Մնացականյանի խոսքով՝ զինծառայությունից զորացրվելուց հետո ՀՀ վարչապետն իրեն արգելել է «բանակի հետ կապ հաստատել»։
Հաջորդ «դատական» նիստը նշանակվել է մարտի 6-ին։
2024-ի դեկտեմբերին Բաքուն դատարան էր հանձնել Ադրբեջանում ապօրինի պահվող 15 անձանց, այդ թվում՝ Արցախի նախկին առաջնորդների քրեական գործը։ Նրանք մեղադրվում են 2548 դրվագով։ Հունվարի 17-ին Բաքվում սկսվել էին Արցախի 8 քաղաքական և ռազմական առաջնորդների դատավարությունները:
Գործով անցնում են 2023-ին գերեվարված Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, նախկին պետնախարար Ռուբեն Վարդանյանը, Արցախի ԱԺ նախագահ Դավիթ Իշխանյանը, ԱԳ նախկին նախարար Դավիթ Բաբայանը, պաշտպանության նախկին նախարար Լևոն Մնացականյանը, Արցախի պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Վարդանյանի գործն առանձին է քննվում։ Նրան սպառնում է ցմահ ազատազրկում Բաքվի բանտում։
