Պետք էր մնալ Արցախում և պայքարել մինչև վերջ․ Ալեն Սիմոնյան
Փետրվարի 11-ին ՀՀ ԱԺ խոսնակ Ալեն Սիմոնյանը հայտարարեց, որ արցախահայությունը կարող էր մնալ և պայքարել մինչև վերջ։ Նա այսպես պատասխանեց արցախցիների՝ հայրենիք հնարավոր վերադարձի մասին լրագրողի հարցին։ «Երբ ապահով լինի, Հայաստանը խաղաղության պայմանագիր կկնքի Ադրբեջանի հետ, կբարձրացվի այդ (հայերի՝ Արցախ վերադարձի- խմբ․) հարցը»,- ասաց ԱԺ նախագահը։
Նույն օրը Սիմոնյանը հավելեց, որ ադրբեջանական զորքերի հարձակման ժամանակ արցախցիները զանգահարել են Հայաստանի իշխանություններին և խնդրել բացել սահմանները, որպեսզի ժողովուրդը կարողանա դուրս գալ։ Սիմոնյանը պնդում է, որ նման խնդրանքներին իրենք պատասխանել են՝ «Ինչպե՞ս կարող է զինվորը շարունակել կռվել, եթե ժողովուրդը լքում է հողը», սակայն Արցախից ասել են՝ «Չէ-չէ, բացեք սահմանները մենք դուրս ենք գալիս, մենք այստեղ էլ չենք մնա»։
Երկար շրջափակումից հետո փորձում են նսեմացնել Արցախի ժողովրդի հերոսական պայքարը. Սամվել Շահրամանյան
Փետրվարի 12-ին Արցախի նախագահ Սամվել Շահրամանյանը դատապարտեց Սիմոնյանի խոսքերը և կոչ արեց նրան ներողություն խնդրել Արցախի ժողովրդից։ Նա ընդգծեց, որ արցախցի յուրաքանչյուր բնակիչ արել է ամեն ինչ, որպեսզի շարունակի ապրել իր պատմական հայրենիքում։
Շահրամանյանը թող ասի, թե ինչպես է կարողացել հեռանալ Արցախից․ Ալեն Սիմոնյան
Սրան ի պատասխան՝ ԱԺ նախագահը Շահրամյանին կոչ արեց պատմել, թե ինչպես է իրեն հաջողվել «ախռաննիկներով շրջապատված» հեռանալ Արցախից, իսկ մնացած գործընկերները չեն կարողացել։
Մենք գործ ունենք տիեզերական մակարդակի ստորության և ցինիզմի հետ․ Արցախի ՄԻՊ
Փետրվարի 11-ին Սիմոնյանի հայտարարությունը քննադատել է նաև Արցախի ՄԻՊ Գեղամ Ստեփանյանը՝ այն անվանելով «տիեզերական մակարդակի ստորություն»։ Նա նաև հիշել է Արցախի ժողովրդի պայքարն ու անձնվիրությունը 2023 թվականի սեպտեմբերին հանրապետության 10-ամսյա շրջափակումից հետո Ադրբեջանի զինված ուժերի ագրեսիայի ժամանակ։
Իշխանությունները նման հայտարարություններով պառակտում են հասարակությունը և քաոս են ստեղծում․ Արման Թաթոյան
Հայաստանի նախկին ՄԻՊ Արման Թաթոյանն Ազգային ժողովի նախագահի հայտարարությունը որակեց որպես ապացույց, որ իշխանություններն են պառակտում և ատելություն սերմանում հասարակության մեջ։ Ըստ նրա՝ այս կերպ ստեղծված քաոսը դարձավ «Քաղաքացիական պայմանագրի»՝ իշխանությունը պահպանելու երաշխիք։
«ՔՊ-ն սրանով է սնվում, և դա նրան ուժ է տալիս, ինչպես որ Ադրբեջանի իշխանությունների ուժի աղբյուրը թշնամանքն է հայերի նկատմամբ»,- նշել է Թաթոյանը։
Արցախյան կողմի կորուստները 2023 թվականի սեպտեմբերին
2023 թվականի սեպտեմբերին Լեռնային Ղարաբաղի վրա Ադրբեջանի հարձակման հետևանքով զոհվել է 223 մարդ, որից 25-ը՝ խաղաղ բնակիչներ, այդ թվում՝ հինգ անչափահաս։ Մարտերի ընթացքում վիրավորվել է 244 մարդ, որոնցից մոտ 80-ը խաղաղ բնակիչներ են, այդ թվում՝ 10 անչափահաս։ 20 մարդ անհետ կորել է, որոնցից հինգը խաղաղ բնակիչներ են։ Այս իրադարձություններից հետո ավելի քան 100 հազար հայեր ստիպված են եղել Լեռնային Ղարաբաղից տեղափոխվել Հայաստան։
Կարդացեք նաև՝ «Մեկ տարի առանց Արցախի». 2023թ․ ադրբեջանական հարձակման և բնիկ հայերի տեղահանության ժամանակագրություն
