Արցախի Ազգային ժողովի պատգամավորներին արգելել են հեռանալ Հայաստանից, գրել է «Ժողովուրդ»-ը։ Ըստ հրապարակման՝ նման իրավիճակում է հայտնվել Արցախի ԱԺ պատգամավոր Գեղամ Ստեփանյանը, ում հետ են ուղարկել «Զվարթնոց» օդանավակայանից և արգելել հատել Հայաստանի սահմանը։ Ստեփանյանը չի պատասխանել թերթի զանգերին, սակայն պատճառը, ըստ լրատվամիջոցի, կապված է կոնկրետ քրեական գործի հետ։
Աղբյուրի տեղեկություննեով՝ Հայաստանի իրավապահներն Արցախի խորհրդարանականներին հերթով հրավիրում են ՔԿ, հարցնում են Արցախում տեղի ունեցած վերջին իրադարձությունների, մասնավորապես՝ Ադրբեջանի կողմից ապօրինի կալանավորված Արցախի նախկին նախագահ Արայիկ Հարությունյանի հրաժարականի պատճառների մասին՝ հետաքրքրվելով, թե ով կարող էր նրան ստիպել հրաժարական տալ։
«Մինչ օրս հարցաքննվել են Արցախի իշխանական թևի պատգամավորները՝ Արայիկ Հարությունյանի «Ազատ հայրենիք-ՔԴՄ» խմբակցության պատգամավորները»,- հայտնել են թերթի աղբյուրները:
2023 թվականի օգոստոսի 31-ին Արցախի նախագահ Արայիկ Հարությունյանը հայտարարել էր հրաժարական տալու մասին։ Սեպտեմբերի 10-ին Արցախի ԱԺ հատուկ նիստում պետնախարար Սամվել Շահրամանյանն ստանձնել էր Արցախի նախագահի լիազորությունները։
