Ֆրանսիացի ֆուտբոլիստ Օլիվյե Ժիրուն աջակցություն է հայտնել ամբողջ աշխարհում հալածվող քրիստոնյաներին, այդ թվում՝ շուրջ 7 ամիս շրջափակման մեջ գտնվող Լեռնային Ղարաբաղի հայերին, հայտնում է Nouvelles d’Arménie-ն։
Հունիսի 15-ին Ժիրուն, Փարիզում Mission Night 2023-ի շնորհանդեսի ժամանակ, աճուրդի է հանել իր մարզաշապիկը, որով նա մասնակցել է ԱԱ-2022-ի Ֆրանսիա-Անգլիա քառորդ եզրափակիչ հանդիպմանը և 78-րդ րոպեին դարձել հաղթական գոլի հեղինակ։
Նա վաճառքից ստացված հասույթը փոխանցել է երկու քրիստոնեական կազմակերպությունների, այդ թվում՝ Portes Ouvertes («Բաց դռներ») հաշվեհամարներին։ Փոխանցված միջոցները կստանա Portes Ouvertes-ի գործընկեր Espoir pour l’Arménie-ն («Հույս Հայաստանի համար»)։
Միջոցառմանը ներկա Portes Ouvertes և Espoir pour l’Arménie Anne-Florence Ռոշը և հովիվ Ռենե Լեոնյանը շնորհակալություն են հայտնել կազմակերպիչներին և նվիրատուներին Հայաստանի և Լեռնային Ղարաբաղի հայերի հետ համերաշխության համար, ինչպես նաև Օլիվյե Ժիրուին՝ գնահատելով նրա հավատքն ու մարդասիրությունը, հայտնում է Nouvelles d’Arménie-ն։
Օլիվյե Ժիրուն «Միլանի» և Ֆրանսիայի հավաքականի հարձակվող է, Ֆրանսիայի ազգային հավաքականի կազմում խփած գոլերով ռեկորդակիր (53 գոլ): 2018 թվականին նա ազգային հավաքականի հետ դարձել է աշխարհի չեմպիոն։
Portes Ouvertes-ը ավետարանական բողոքականների ֆրանսիական ոչ կառավարական ասոցիացիա է։ Ամեն տարի հրապարակում է «Քրիստոնյաների հալածանքի համաշխարհային ինդեքս» զեկույցը, որը պարունակում է տվյալներ ամբողջ աշխարհում քրիստոնյաների հալածանքների՝ եկեղեցիների ավերման, ձերբակալությունների, բռնաճնշումների, սպանությունների մասին։
