Վրաստանը կարող է երկար ժամանակով զրկվել Եվրամիությանն անդամակցելու հնարավորությունից, լրագրողներին հայտնել է Թբիլիսիում ԵՄ դեսպան Պավել Գերչինսկին, փոխանցում է ՏԱՍՍ-ը։
«2023 թվականին Եվրամիությունը Վրաստանի համար բացեց եվրոպական ընտանիքի դռները, և Վրաստանը դարձավ ԵՄ անդամության թեկնածու։ Մենք միասին տոնեցինք այս պատմական պահը։ Այսօր Վրաստանի եվրաինտեգրումը դադարեցված է․ ցավալի է, որ Վրաստանը կարող է երկար ժամանակ կորցնել Եվրամիության անդամ դառնալու պատմական հնարավորությունը։ Ավելին ՝ ժողովրդավարությունը Վրաստանում վտանգված է», – պնդել է Գերչինսկին։
Եվրոպացի դիվանագետը նշել է, որ հունիսի 23-ին ԵՄ ԱԳ նախարարների նիստում հնարավոր է՝ քննարկվի նաև Վրաստանի հարցը, մասնավորապես ԵՄ-ի դեմ ուղղված ապատեղեկատվությունը, պատժամիջոցների կիրառման հնարավորությունը և առանց վիզայի ռեժիմը:
Թբիլիսիի և Բրյուսելի հարաբերությունները լարվել են 2024 թվականի մայիսից, երբ Վրաստանի խորհրդարանն ընդունեց օտարերկրյա գործակալների մասին օրենքը։ ԵՄ-ն հարցեր ունի նաև 2024 թվականի հոկտեմբերի 26-ին Վրաստանում կայացած խորհրդարանական ընտրությունների արդարության և թափանցիկության վերաբերյալ։
2025 թվականի հունվարին ԵՄ-ն դադարեցրել էր առանց վիզայի ռեժիմը վրացի դիվանագետների և պաշտոնատար անձանց համար։ Միության առանձին երկրներ նաև անհատական պատժամիջոցներ են սահմանել վրացական իշխանության ներկայացուցիչների դեմ։
