Վրաստանում «Օտարերկրյա ազդեցության թափանցիկության մասին» նոր օրենքը Մեծ Բրիտանիային ստիպել է հետ կանչել դրամաշնորհային ծրագրերը, մասնավորապես՝ ուղղված հոկտեմբերին նախատեսվող տեղական ինքնակառավարման ընտրությունների թափանցիկության աջակցմանը, հայտնում է Кавказский Узел-ը:
«Օտարերկրյա գործակալների մասին» օրենքը Վրաստանում ուժի մեջ էր մտել մայիսի 31-ին, այն տարածվում է նաև ֆիզիկական անձանց վրա և նախատեսում է ազատազրկում՝ օրենքը չկատարելու համար։ Ապրիլի 16-ին Վրաստանի խորհրդարանը երրորդ ընթերցմամբ փոփոխություններ էր ընդունել «Դրամաշնորհների մասին» օրենքում, որը տարածվում է օտարերկրյա ֆինանսավորում ստացող ցանկացած կազմակերպության վրա։
Ինչպես նշում է լրատվամիջոցը, այս փոփոխությունների պատճառով Մեծ Բրիտանիան չի կարողանա ֆինանսավորել ծրագրեր, որոնք ուղղված են ՏԻՄ թափանցիկությանն ու մրցունակությանը:
Մեծ Բրիտանիայի դեսպանատան տվյալներով՝ այս ծրագրերի ֆինանսավորման վերաբերյալ քննարկումներ են տեղի ունեցել Վրաստանի կառավարության հետ հոկտեմբերի 4-ին նախատեսվող տեղական ընտրություններից առաջ։ Սակայն Վրաստանի իշխանությունները հայտնել են, որ դեռևս պատրաստ չէ կառավարության «Դրամաշնորհների հաստատման կարգի մասին» որոշումը, և չկա մեխանիզմ՝ նոր օրենքներին համապատասխան դրամաշնորհների բաշխման համար։
Օրինագծի դեմ բողոքի ակցիաները Վրաստանում շարունակվում են արդեն մեկ տարուց ավելի։
