Իրանի կատարած աշխատանքային այցի ընթացքում ՀՀ ԱԽ քարտուղար Արմեն Գրիգորյանը հանդիպել է Իրանի նախագահ Մասուդ Փեզեշքիանի հետ, – հայտնել են Անվտանգության խորհրդից։
Նշվում է, որ հանդիպման ընթացքում զրուցակիցները գոհունակությամբ ընդգծել են Հայաստան-Իրան հարաբերությունների զարգացման դինամիկ ընթացքը ու կարևորել ակտիվացած երկկողմ փոխայցելությունները:
ԻԻՀ նախագահն իր ջերմ ողջյուններն է փոխանցել ՀՀ վարչապետ Նիկոլ Փաշինյանին:
Այսօր ավելի վաղ Թեհրանում ԱԽ քարտուղարը հանդիպել է Իրանի ազգային անվտանգության բարձրագույն խորհրդի քարտուղար Ալի Աքբար Ահմադիանին և ԻԻՀ գերագույն առաջնորդի խորհրդական, Արտաքին հարաբերությունների ռազմավարական խորհրդի ղեկավար Քամալ Խարազիին։
Մայիսի 16-ին Գրիգորյանն աշխատանքային այցով մեկնել էր Իրան` մասնակցելու «Թեհրանի երկխոսություն ֆորում 2025»-ին։ Մայիսի 17-ին Իրանի արտաքին գործերի նախարար Աբբաս Արաղչին ՀՀ ԱԽ քարտուղարի հետ հանդիպմանը կոչ էր արել շուտափույթ կնքել Հայաստանի և Ադրբեջանի միջև խաղաղության պայմանագիրը։
