Հարավային գազային միջանցքի խորհրդատվական խորհրդի 11-րդ նախարարական նիստում Ադրբեջանի նախագահ Իլհամ Ալիևը հայտարարել է դեպի Եվրամիություն մատակարարումների աշխարհագրության ընդլայնման անհրաժեշտության մասին, հայտնել են ադրբեջանական ԶԼՄ-ները։
«Եվրոպա գազի մեր մատակարարումների աշխարհագրությունը կընդլայնվի, քանի որ արդեն աշխատում ենք եվրոպական որոշ երկրներում գազաբաշխիչ ցանցի ստեղծման ուղղությամբ։ Դրանցից մի քանիսում այն կա, մյուսներում պետք է ընդլայնվի»,- ասել է նա՝ ընդգծելով, որ այսօրվա դրությամբ՝ Ադրբեջանը բնական գազ է մատակարարում 12 երկրի, որոնցից 10-ը եվրոպական երկրներ են, 8-ը՝ ԵՄ անդամ։
Միևնույն ժամանակ՝ Ադրբեջանի էներգետիկայի նախարար Փարվիզ Շահբազովը չի բացառել, որ Ադրբեջանի և եվրոպացի սպառողների միջև կարող են երկարաժամկետ գազային պայմանագրեր կնքվել։ Նրա խոսքով՝ «պայմանագրերի ստորագրումը կարևորագույն երաշխիք կդառնա ԵՄ-ի համար»։
Շահբազովը նշել է, որ Ադրբեջանից Եվրոպա արտահանվող գազի ծավալները կրկնապատկվել են և հասել 14 մլրդ խորանարդ մետրի:
2022 թվականի հուլիսին Ադրբեջանը և Եվրամիությունը փոխըմբռնման հուշագիր էին ստորագրել էներգետիկ ոլորտում ռազմավարական համագործակցության վերաբերյալ։ 2022 թվականի հոկտեմբերին Ադրբեջանի նախագահը հայտարարել էր, որ Բաքուն մտադիր է մինչև 2027 թվականը կրկնապատկել գազի մատակարարումները Եվրոպա՝ հասցնելով 18 մլրդ խորանարդ մետրի։
«Գեղարդ» գիտավերլուծական հիմնադրամը վերլուծական հոդվածում գրել էր, որ 2024 թվականին Ադրբեջանը 12,9 մլրդ խմ գազ է արտահանել Եվրոպա, ուր ադրբեջանական գազի խոշորագույն սպառողն Իտալիան է։ 2025-ի հունվարին Ադրբեջանը դադարեցրել էր գազի մատակարարումը Սերբիա։
