Ադրբեջանի իշխանությունները որոշել են Կրեմլի կողմից վերահսկվող Sputnik Ադրբեջանի խմբագրության աշխատակիցների թիվը 40-ից կրճատել՝ հասցնելով 1-ի մեկին, հայտնում են ադրբեջանական ԶԼՄ-ները։
Նշվում է, որ որոշումը կապված է «արտերկրում ադրբեջանական պետական լրատվամիջոցների և Բաքվում օտարերկրյա լրագրողների աշխատանքային պայմաններում հավասարակշռությունը վերականգնելու անհրաժեշտության հետ»: Լրատվամիջոցը նշել է, որ սա սիմետրիկ պատասխան է Ռուսաստանում «Ազերթագ» պետական գործակալության մեկ աշխատակցի կրճատմանը։ Սպասվում է, որ ռուսական Sputnik լրատվական գործակալության Բաքվի մասնաճյուղը կփակվի։
Ըստ աղբյուրի՝ նույն մոտեցումը կկիրառվի նաև BBC Ադրբեջանի նկատմամբ, սակայն բրիտանական կորպորացիայի աշխատակիցների թվի կրճատման մասին դեռ հստակ տեղեկություն չկա։
Փետրվարի 6-ին Ադրբեջանի ԱԳՆ-ն կոչ էր արել դադարեցնել «Ռուսական տան» գործունեությունը Բաքվում՝ պատճառաբանելով այն հանգամանքով, որ այն Բաքվում գրանցված չէ որպես իրավաբանական անձ։ Հունվարի 28-ին «Ռոսսոտրուդնիչեստվոյի» ղեկավար Եվգենի Պրիմակովը հայտարարել էր ադրբեջանական Baku.tv-ի դեմ դատական հայց ներկայացնելու մասին, քանի որ հեռուստաալիքի ռեպորտաժում հեղինակը նշել էր, թե Բաքվում «Ռուսական տանը» «լրտեսների բույն, անջատողականների որջ կա»։
«Ռոսսոտրուդնիչեստվոյի» ղեկավարը շեշտել էր, որ Ադրբեջանում ռուսական մշակութային կենտրոնը գործում է Ռուսաստանի և Ադրբեջանի միջև միջկառավարական համաձայնագրով, այն հետևում է սահմանված պայմանավորվածություններին ու օրենքներին և զբաղվում է բացառապես կրթական, մշակութային գործառույթներով։ Փետրվարի 6-ին ադրբեջանական ԶԼՄ-ները գրել էին, որ Բաքուն պաշտոնական ծանուցում է ուղարկել ռուսական կողմին՝ Ադրբեջանի տարածքում «Ռոսսոտրուդնիչեստվո» գործակալության գործունեությունը դադարեցնելու վերաբերյալ։
