«Քաղաքացիական պայմանագիր» կուսակցությունը մտադիր է քննարկման առարկա դարձնել այն պատգամավորների վարքը, որոնք պարբերաբար աչքի են ընկնում ոչ ստանդարտ պահվածքով, սակայն դա որևէ հետևանք չի ունենում, գրել է «Հրապարակ»-ը։
«Եթե Վիլենին չի կարելի, ապա չի կարելի նաև մյուսներին, և նրանք էլ պետք է մանդատից զրկվեն»,- ասել է ՔՊ պատգամավորներից մեկը։
Թերթը հիշեցրել է ԱԺ նախագահ Ալեն Սիմոնյանի թքելը քաղաքացու վրա, պատգամավոր Անդրանիկ Քոչարյանի վիրավորելը լրագրողներին։
Ըստ թերթի՝ խմբակցությունում կարծիք կա, որ գործընկերները «սարքել են Գաբրիելյանի գլխին», որ Գյումրիում անհաջողության հետ կապված «զայրույթը վարչապետ Նիկոլ Փաշինյանը նրա գլխին թափի»։
«Հենց ՔՊ ներկայացուցիչների հետ է Վիլենը խմել, իսկ ՔՊ-ում բոլորը գիտեն, թե ինչ է լինում, երբ Վիլենն ալկոհոլ է օգտագործում, ուստի պետք է թույլ չտային, որ փողոց դուրս գար»,- շեշտել է թերթը։
Ապրիլի 1-ին Գաբրիելյանը հայտարարել էր մանդատը վայր դնելու մասին։ Մարտի 30-ին Գյումրիում՝ ավագանու արտահերթ ընտրությունների ժամանակ, Գաբրիելյանի և լրագրողների միջև միջադեպ էր տեղի ունեցել, Գաբրիելյանը նաև հայհոյանք էր հնչեցրել։ Պատասխանելով լրագրողների հարցին, թե այդ ամենից հետո չի՞ պատրաստվում մանդատը վայր դնել, նա նշել էր, որ «2026-ին իշխանությունը փոխվելու է, և մանդատը վայր դնելու կարիք չի տեսնում»։
