ՀՀ վարչապետ Նիկոլ Փաշինյանի Բրյուսել այցն անսպասելի էր նաև «Քաղաքացիական պայմանագրի» ներկայացուցիչներից շատերի համար, գրել է «Հրապարակ» օրաթերթը՝ հղում անելով իր աղբյուրին։
Ըստ թերթի՝ հրատապ այցը Բրյուսել պայմանավորված էր հուլիսի 10-ին Փաշինյանի Աբու Դաբի այցով և այնտեղ Ադրբեջանի նախագահ Իլհամ Ալիևի հետ ձեռք բերված պայմանավորվածություններով՝ Վաշինգտոնի մասնակցությամբ։
Ըստ թերթի՝ Բրյուսելից հարցեր են առաջացել՝ ինչո՞ւ ԱՄՆ-ի միջնորդությամբ այդքան արագ կողմերը կարողացան համաձայնության գալ։
«Ասում են՝ Բրյուսելից են կանչել Փաշինյանին, որ ներկայացնի, թե ինչպե՞ս ստացվեց, որ ամիսներ, տարիներ շարունակ հավաքական Արևմուտքի քավորությամբ պայմանագրի ստորագրումը չստացվեց, իսկ ԱՄՆ միջնորդությունը կարծես արդյունք է տալիս, և համաձայնության են եկել «Զանգեզուրի միջանցքի» հարցով»,- գրել է թերթը։
Ի պատասխան, լրատվականի տեղեկությամբ, Փաշինանը ԵՄ-ին չնեղացնելու համար հանձն է առել ավարտին հասնել Ռուսաստանին տարածաշրջանից վերջնականապես դուրս մղելու ծրագիրը։
Բրյուսելում հուլիսի 14-ին տեղի ունեցած հանդիպման ժամանակ Եվրոպական խորհրդի նախագահ Անտոնիու Կոշտան և Եվրոպական հանձնաժողովի նախագահ Ուրսուլա Ֆոն դեր Լեյենը շնորհակալություն էին հայտնել Հայաստանին` սերտ համագործակցության և պատժամիջոցների շրջանցումը կանխելու ուղղությամբ ձեռնարկված քայլերի համար:
Ազգային ժողովը մարտի 26-ին ամբողջությամբ ընդունել էր ԵՄ-ին ՀՀ անդամակցության մասին օրինագիծը: Փաշինյանը հունվարին ընդգծել էր, որ նախագիծը չի նշանակում Հայաստանի անհապաղ անդամակցում ԵՄ-ին, և վերջին խոսքը պետք է հայտնեն քաղաքացիները՝ հանրաքվեի միջոցով։ Նույն օրը Կրեմլից նշել էին, որ Հայաստանը չի կարող միաժամանակ լինել և՛ ԵՄ, և՛ ԵԱՏՄ անդամ։
