Եվրամիությունը կարևորում է Հայաստան-ԵՄ սերտ համագործակցությունը և շահագրգռված է Հարավային Կովկասի տարածաշրջանում կայուն խաղաղության հաստատման գործում, ՀՀ նախագահ Վահագն Խաչատուրյանի հետ հանդիպմանը հայտարարել է պաշտոնական այցով Հայաստան ժամանած Եվրոպական հանձնաժողովի փոխնախագահ, ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Կայա Կալասը։
Նախագահի աշխատակազմից տեղեկացրել են, որ Խաչատուրյանը կարևորել է ԵՄ-ի հետ համագործակցությունը, քանի որ «Հայաստանի Հանրապետությունն այսօր որդեգրել է մի ճանապարհ, որն ընդհանրական ձևակերպմամբ կարելի է անվանել ժողովրդավարության ուղի»։
Խաչատուրյանը խոսել է երկրի արտաքին քաղաքական առաջնահերթությունների մասին՝ ընդգծելով, որ «Հայաստանը հաստատակամորեն հետևում է տարածաշրջանում խաղաղության հաստատման և բոլոր հարևան երկրների հետ բարիդրացիական հարաբերությունների կառուցման ուղուն»։
Նշվում է, որ կողմերը մտքեր են փոխանակել նաև էներգետիկայի, մասնավորապես՝ վերականգնվող ու «կանաչ» էներգիայի ոլորտում համագործակցությունն ընդլայնելու հնարավորությունների շուրջ՝ ընդգծելով այդ ուղղությամբ Հայաստան-ԵՄ փոխգործակցության խթանման և նոր նախաձեռնությունների ձևավորման կարևորությունը։
