Հայաստանի և Ռուսաստանի արտաքին գործերի նախարարներ Արարատ Միրզոյանը և Սերգեյ Լավրովն ուղերձ են հղել՝ նվիրված Երևանի և Մոսկվայի միջև դիվանագիտական հարաբերությունների 33-րդ տարեդարձին և ընդգծել երկու երկրների ժողովուրդների շահերից ելնելով՝ փոխշահավետ համագործակցություն զարգացնելու իրենց մտադրությունը։
Լավրովն ուղերձում նշել է, որ Ռուսաստանը և Հայաստանն ստեղծել են ամուր պայմանագրային և իրավական հիմքեր, կառուցել բազմակողմ, հավասար, փոխշահավետ հարաբերություններ: Միրզոյանն ընդգծել է, որ շնորհիվ համատեղ կառուցողական և արդյունավետ աշխատանքի, Հայաստանի և Ռուսաստանի միջպետական հարաբերություններն ամրապնդվել և ընդլայնվել են:
«Հայաստանը նպատակ ունի շարունակել ու ընդլայնել բովանդակալից, երկու երկրների շահերին ամբողջությամբ համապատասխանող երկխոսությունը, որպես ուղենիշ հիմք ընդունելով քաղաքական, սոցիալ-տնտեսական, մարդասիրական և այլ ոլորտներում երկարաժամկետ փոխշահավետ համագործակցությունը»,- ասվում է Միրզոյանի ուղերձում։
Լավրովն ընդգծել է, որ Միջազգային հարաբերությունների փոփոխվող ճարտարապետության ժամանակակից պայմաններում «կարևոր է շարունակել գործընկերային փոխգործակցությունը՝ հիմնվելով երկու պետությունների շահերի վրա և ի բարօրություն երկու երկրների ու ժողովուրդների»
ՌԴ ԱԳՆ ղեկավարի խոսքով՝ միջազգային ոլորտում փոխակերպումները նշանավորել են Մոսկվայի և Երևանի երկկողմ հարաբերությունների ժամանակակից փուլի սկիզբըը՝ հիմնվելով ընդհանուր հոգևոր և բարոյական արժեքների, միջոլորտային և հումանիտար շփումների ավանդական հզորության վրա։
Այս համատեքստում նա ընդգծել է Մոսկվայի պատրաստակամությունը՝ շարունակել համատեղ աշխատանքը՝ նպատակ ունենալով է՛լ ավելի խորացնել և բարելավել գործընկերության արդյունավետությունը՝ ի շահ երկու երկրների քաղաքացիների և ի շահ Հարավային Կովկասում խաղաղության ու անվտանգության ամրապնդման։
«Չնայած ռուս-հայկական դաշինքը խարխլելու արտաքին փորձերին՝ մեզ հաջողվել է պահպանել քաղաքական երկխոսության և արտաքին քաղաքականության համակարգման բարձր մակարդակ, ինչպես նաև մեծացնել առևտրատնտեսական համագործակցությունը ինչպես երկկողմ, այնպես էլ միասնական ինտեգրացիոն տարածքի ձևաչափով»,- նշել է Լավրովը։
