Հայ Առաքելական եկեղեցու Արագածոտնի թեմի առաջնորդ, կալանքի տակ գտնվող եպիսկոպոս Մկրտիչ Պռոշյանը դատապարտել է Հայ Առաքելական եկեղեցու մի խումբ հոգևորականների հայտարարություններն ու գործողությունները, որոնք պահանջել էին Ամենայն հայոց կաթողիկոս Գարեգին Բ-ի հրաժարականը։ Նա նրանց գործողությունները« պառակտիչ և զրպարտելի» է անվանել։
«Ակնհայտ է, որ այս հայտարարությունները և արարքները ոչ թե հոգևոր սթափության կամ «բարենորոգչության» նպատակ ունեն, այլ քաղաքական պատվերների ազդեցության և ճնշման հետևանքով հանգեցնելու են եղբայրասիրության, հավատքի ու եկեղեցական հավատարմության կորստյան»,- շեշտել է Մկրտիչ սրբազանը։
Նա հիշեցրել է, որ վեհափառը ոչ միայն Հայաստանյայց Առաքելական եկեղեցու առաջնորդն է, այլև հայ ժողովրդի հավատքի միասնության պահապանը։ Նրան ընդդիմանալը ոչ թե անձին ընդդիմանալ է, այլ հարված՝ եկեղեցու հիմքին։
«Մոռացվել է, որ եկեղեցին ոչ թե քաղաքական ճնշումներին հպատակվող կառույց է, այլ՝ աստվածահիմն սուրբ մարմին։ Դավաճանել հայրապետին՝ նշանակում է դավաճանել եկեղեցուն և սեփական հոտին, ուրանալ հավատքը։ Եկեղեցին որևէ մեկի գործիքը չէ, ոչ էլ՝ իշխանահաճո շահերի սպասարկու»,- նշել է նա։
Մկրտիչ սրբազանը կոչ է արել սթափվել և հիշել, որ այս վարքագիծը համահունչ չէ ո՛չ ավետարանական եղբայրասիրությանը, ո՛չ եկեղեցական կանոնականությանը․ այն վտանգում է եկեղեցու հեղինակությունն ու հավատացյալների վստահությունը։
Այսօր ավելի վաղ կալանավորված արքեպիսկոպոսներ Միքայել Աջապահյանը և Բագրատ Գալստանյանը Գարեգին Բ-ից պահանջել էին դադարեցնել 10 եպիսկոպոսի պաշտոնավարումը՝ որպես թեմակալ։
Նոյեմբերի 30-ին Հայ Առաքելական եկեղեցու մի խումբ եպիսկոպոսներ և արքեպիսկոպոսներ կոչ էին արել կաթողիկոսին «հանգստյան կոչվել» և նոր ընտրություններ կազմակերպել։ Հայտարարությունն ստորագրել էր Հայ Առաքելական եկեղեցու 10 հոգևորական։ Նրանց մեծ մասը նախկինում ստորագրել էր Մայր Աթոռի դիվանապետ Արշակ արքեպիսկոպոս Խաչատրյանի հրաժարականը պահանջող հայտարարություն, ինչպես նաև մասնակցել էր վարչապետ Նիկոլ Փաշինյանի հետ հանդիպմանը։
