«Տաշիր» ընկերությունների խմբի նախագահ Սամվել Կարապետյանը հայտարարել է նոր քաղաքական ուժ ձևավորելու մասին, տեղեկանում ենք գործարարի ուղերձից, որը տարածել է նրա պաշտպանության խորհուրդը։
Կարապետյանը տեղեկացրել է, որ իրենց քաղաքական թիմի ձևավորումը մեկնարկել է։
«Այս օրերին շատ քննարկվեց իմ ուղերձը, բայց, ցավոք, իրականությունից կտրված տարբեր մեկնաբանություններ ևս արվեցին։ Կարծում եմ՝ շատ պարզ եմ արտահայտվել՝ ստեղծելու ենք սկզբունքորեն նոր քաղաքական ուժ։ Անելո՛ւ ենք՝ մեր ձևով»,- հայտարարել է գործարարը՝ նկատի ունենալով հուլիսի 4-ի երթի ժամանակ իր փոխանցած ուղերձը, որտեղ շեշտել էր նոր քաղաքական ուժ ձևավորելու անհրաժեշտության մասին։
Նա շնորհակալություն է հայտնել հուլիսի 4-ի երթի մասնակիցներին, որոնք, նրա խոսքով, քաղաքացիական արիություն են ցուցաբերել։ Կարապետյանը շնորհակալություն է հայտնել նաև իրեն աջակցողներին։ Գործարարը չի բացառել ներքաղաքական համագործակցությունը համախոհների հետ։
«Մեծ հարգանքով եմ վերաբերվում մինչ օրս վարչապետ Նիկոլ Փաշինյանի հակազգային իշխանության քաղաքականության դեմ իրական պայքար մղած քաղաքական ուժերին և գործիչներին։ Բայց մենք Հայաստանի համար լավ ապագա կառուցելու մեր պատկերացումն ունենք և գնալու ենք մեր ճանապարհով, մեր նոր թիմով»,- շեշտել է նա։
Հուլիսի 4-ին Երևանում տեղի էր ունեցել հանրահավաք՝ ի աջակցություն «Տաշիր» ընկերությունների խմբի ղեկավարի։ Մասնակիցները Մաշտոցի պողոտայից երթով շարժվել էին դեպի ԱԱԾ շենք, որտեղ պահվում էր Կարապետյանը։
Հունիսի 19-ին դատարանը երկու ամսով կալանավորել էր Կարապետյանին իշխանությունը զավթելու կոչեր հնչեցնելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Փաշինյանը խիստ էր արձագանքել Կարապետյանի հայտարարությանը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում: Հուլիսի 4-ին դատարանն անփոփոխ էր թողել Կարապետյանին կալանավորելու որոշումը։
