Կառավարությունը հունիսի 26-ի նիստում հուլիսի 1-ին՝ ժամը 11։00-ին, Ազգային ժողովի արտահերթ նիստ գումարելու որոշում է ընդունել։
Գործադիրը որոշումը բացատրել է այն հանգամանքով, որ հունիսի 17-19-ի նստաշրջանն ավարտվել է, բայց օրակարգում ներառված հարցերը ժամանակի սղության պատճառով չեն քննարկվել, և անհրաժեշտություն է առաջացել դրանք քննարկել արտահերթ նստաշրջանի ընթացքում։ Նշվում է, որ նիստերի օրակարգում մասնավորապես ընդգրկված էին մի շարք օրենքների անհետաձգելի նախագծեր։
Նշենք, որ նիստերի օրակարգում են նաև «Հայաստան» խմբակցության պատգամավոր Սեյրան Օհանյանի և խմբակցության քարտուղար Արծվիկ Մինասյանի նկատմամբ քրեական հետապնդում հարուցելուն համաձայնություն տալու մասին նախագծերը։
Հունիսի 9-ին գլխավոր դատախազ Աննա Վարդապետյանը Օհանյանի և Մինասյանի նկատմամբ քրեական հետապնդում հարուցելու համաձայնության դիմում էր ներկայացրել ԱԺ նախագահ Ալեն Սիմոնյանին։
