ՀՀ կառավարության շենքի դիմաց անհայտ կորած զինծառայողների ծնողներից մի քանիսը հունիսի սկզին բռնել են ԱԺ Առողջապահության հարցերի հանձնաժողովի նախագահ, Առողջապահության նախկին նախարար Արսեն Թորոսյանի օձիքից, հայտնել է «Ժողովուրդ» օրաթերթը՝ հղում անելով իր աղբյուրներին։
Ըստ թերթի՝ երբ այս տարվա հունիսի սկզբին ՀՀ վարչապետ Նիկոլ Փաշինյանն ընդունել էր անհայտ կորած զինծառայողների ծնողներին, վստահեցրել էր, որ ամեն ինչ արվում է երեխաների որոնման և վերադարձի համար:
Ծնողները, դժգոհության ֆոնին, կառավարության շենքի դիմաց տեսնելով Թորոսյանին, որը ԴՆԹ հետազոտությունների հարցերով պատասխանատուն էր դատաբժշկական գիտագործնական կենտրոնի տնօրեն Մհեր Բիշարյանի հետ, բղավել են նրա վրա, թե «ԴՆԹ հետազոտությունները դարձրել եք ծաղր», գրել է թերթը։
Ավելի վաղ Թորոսյանը հրապարակել էր օրաթերթի թղթակցի հետ իր ունեցած նամակների լուսապատճենները՝ նշելով, որ հերքել է թերթին հասած տեղեկությունը, սակայն այս օրաթերթից պետք է սպասել «հերթական լուտանքին»։
