Հայաստանի նախկին վարչապետ Կարեն Կարապետյանը հայտարարությամբ իր աջակցությունն է հայտնել «Տաշիր» ընկերությունների խմբի նախագահ Սամվել Կարապետյանին:
«Այն ամենը, ինչ այսօր կատարվում է Կարապետյանի ու նրա ընտանիքի նկատմամբ, ամոթալի է, անթույլատրելի և անպատվաբեր ցանկացածի, բայց նախ և առաջ՝ մեր երկրի համար: Տարիներ շարունակ նրա ու իր ընտանիքի գործունեությունը կապված է մեր հայրենիքի զարգացման հետ, իր մշտական աջակցությամբ ներկա է գտնվել հայ ժողովրդի կյանքում տեղի ունեցող բոլոր կարևորագույն իրադարձություններին»,- ասված է Կարեն Կարապետյանի հայտարարության մեջ:
Նա ընդգծել է, որ Սամվել Կարապետյանը միայն Հայաստանում չէ, որ մեծ հեղինակություն ունի:
«Պատահական չէ, որ նա մեծ հեղինակություն է վայելում ոչ միայն երկրում, այլև դրա սահմաններից դուրս` մշտապես բարձր պահելով հայ ժողովրդի պատիվն ու անունը, դժվար պահերին հենարան լինելով բազմաթիվ հայրենակիցների, մեծամասամբ՝ դա անելով լուռ: Այս համատեքստում, բնական է, որ չէր կարող անտարբեր մնալ Հայ Առաքելական եկեղեցու նկատմամբ կատարվող գործողություններին: Իմ զորակցությունն եմ հայտնում իմ լավ ընկերոջն ու բարեկամին», – նշել է ՀՀ նախկին վարչապետը:
Սամվել Կարապետյանը հունիսի 17-ին մեկնաբանել էր Հայ Առաքելական եկեղեցու դեմ Հայաստանի իշխանությունների արշավը, որից հետո Ներքին գործերի նախարարության հատուկ նշանակության ստորաբաժանումները խուզարկություններ էին սկսել «Տաշիր» ընկերությունների խմբի նախագահի տանը՝ Երևանում։
ՆԳՆ-ից Armenia Today-ին մեկնաբանել էին, որ Կարապետյանի առանձնատան մոտ «մի խումբ անձինք բերման են ենթարկվել, իրականացվում են օպերատիվ գործողություններ»։ Գործարարի եղբայրը՝ նախկին պատգամավոր Կարեն Կարապետյանը, հայտնել էր, որ ավելի քան 45 անձ է բերման ենթարկվել, այդ թվում՝ ձեռքի կոտրվածքներով։ Կարապետյանի առանձնատան մոտ հարյուրավոր քաղաքացիներ էին հավաքվել՝ աջակցություն հայտնելու նրան։
Հունիսի 18-ի գիշերը` խուզարկության մեկնարկից մոտ ութ ժամ անց՝ գիշերը ժամը երեքին, Կարապետյանը ոստիկանների ուղեկցությամբ դուրս էր եկել իր առանձնատնից և տեղափոխվել ՆԳՆ կազմակերպված հանցագործությունների դեմ պայքարի գլխավոր վարչություն, այնուհետև՝ Քննչական կոմիտե:Armenia Today-ի տեղեկություններով՝ ՆԳՆ ոստիկանության քրեական ոստիկանության գլխավոր վարչությունում քննչական գործողություններից հետո Կարապետյանին տեղափոխել են Քննչական կոմիտե:
