Իշխանությունը եկեղեցու ներսում աշխատանքներ է տանում՝ տարբեր հոգևորականների միջոցով Ամենայն Հայոց կաթողիկոս Գարեգին Բ-ի դեմ կոալիցիա ստեղծելու և նրան հեռացնելու նպատակով հիմք ստեղծելու համար, գրել է «Հրապարակ»-ը՝ հղում անելով իր աղբյուրներին։
Ըստ թերթի՝ կաթողիկոսին դեմ հոգևորականները դեռ փոքրաթիվ են՝ մեծամասնություն դառնալու և եկեղեցու ներսում «իշխանափոխություն» իրականացնելու համար։
«Ժողովուրդ» օրաթերթն էլ գրում է, որ «Քաղաքացիական պայմանագիր» կուսակցության վարչության վերջին նիստի ժամանակ գրեթե բոլորը պնդել են, որ ճնշումները եկեղեցու վրա պետք է շարունակել:
«Ճնշումները կմեծանան բոլոր այն ընդդիմադիր ուժերի վրա, որոնք նախօրեին գնացել են օդանավակայան ու դիմավորել Գարեգին Բ-ին` հաջակցություն նրա»,- տեղեկացրել է թերթը։
Մայիսի 29-ին վարչապետ Նիկոլ Փաշինյանը հայտարարել էր, թե «հայկական եկեղեցիները չուլանոց, աղբավայր են դարձրել», ինչից հետո նրան քննադատել էին։ Ի պատասխան՝ մայիսի 30-ին մի շարք գրառումներով անդրադարձել էր հոգևորականներին ու նշել, որ պետությունը պետք է մասնակից լինի կաթողիկոսի ընտրություններին։ Վարչապետի կինը՝ Աննա Հակոբյանը, հոգևորականներին մեղադրել էր այլասերվածության մեջ։
Հունիսի 2-ին Փաշինյանը հայտարարել էր՝ «եթե պարզվի, որ Գարեգին Բ-ն խախտել է կուսակրոնության ուխտը և զավակ ունի, նա չի կարող զբաղեցնել այդ պաշտոնը»։ Ավելի ուշ Գերագույն հոգևոր խորհուրդը կոչ էր արել կասեցնել «վարչապետի անօրինական և անհեռատես քաղաքականությունը»։ Հունիսի 9-ին վարչապետը կոչ էր արել համախմբվել նոր կաթողիկոսի ընտրության շուրջ՝ պնդելով, որ Գարեգին Երկրորդը զավակ ունի: Հունիսի 10-ի վաղ առավոտյան Փաշինյանն առաջարկել էր ստեղծել համակարգող խումբ՝ Սուրբ Էջմիածնի Վեհարանն ազատելու և կաթողիկոսական նոր ընտրությունների օրակարգի կազմակերպչական հարցերի համար։
Հունիսի 11-ին՝ կեսգիշերն անց, Գարեգին Երկրորդն ԱՄԷ-ից ժամանել էր Հայաստան, նրան դիմավորել էին իր աջակիցները: Կաթողիկոսը հայտարարել էր՝ վարչապետի հայտարարությունները համընդհանուր վրդովմունք են առաջացրել:
