Իշխանությունների և ընդդիմության փոխադարձ արշավը կապված է 2026 թվականի խորհրդարանական ընտրությունների նախապատրաստման հետ, գրել է Երևանի նախկին քաղաքապետ, «Նոր ուժ» կուսակցության նախագահ Հայկ Մարությանը։
Նա նշել է, որ «իշխանության ու «ավանդական» ընդդիմության միջև փոխհրաձգությունները հատել են բոլոր թույլատրելի սահմանները»։
«Մի կողմից տիտղոսային ընդդիմության գործիչները սովորական են դարձրել հակառակորդ ճամբարի դեմ անեծքներն ու անձնական թիրախավորման դեպքերը։ Մյուս կողմից՝ իշխանությունը՝ Նիկոլ Փաշինյանի գլխավորությամբ, իբր «ստիպված» պատասխանելով քննադատությանը, անպարկեշտ ու հայհոյախառն արշավ է սկսել ընդդիմադիրների դեմ»,- գրել է նա։
Մարությանը շեշտել է, որ վերջին օրերին երկրի վարչապետի ու նրա թիմակիցների բառապաշարը նաև կոպտորեն խախտում է Սահմանադրությամբ պետական պաշտոնյաներին վերապահված սահմանները։
«Ոչ ոք, ո՛չ ընդդիմությունը, ո՛չ իշխանությունը, իրավունք չունեն մտնել մարդկանց անձնական դաշտ։ Ակնհայտ է, որ այս ամենն անում են միայն մեկ նպատակով՝ պատրաստվում են 2026-ի ընտրություններին՝ կարծելով, թե դրանով իրենց կողմը կգրավեն մարդկանց։ Վստահ եմ, որ նրանք սխալվում են։ Չկա այդպիսի քաղաքական նպատակ, որն իրավունք կտար հանրային դաշտը վերածել գարշահոտ ախոռի։ Այս փոխադարձ արշավը կործանարար է՝ այն քայքայում է հասարակությունը, շեղում է մեզ կարևոր հարցերի քննարկումից, կասեցնում է մեր զարգացումը, խոցելի է դարձնում մեզ ներսում, առավել ևս՝ դրսում, վտանգում է մեր երեխաների ապագան»,- ընդգծել է նախկին քաղաքապետը։
Մարությանը հորդորել է վերջ տալ «ամոթալի գրառումներին»։
«Մենք այսպիսին չե՛նք, մենք համաձայն չե՛նք ու պարտավոր չենք ամենօրյա ռեժիմով հետևել ձեր ամոթալի գրառումներին, ազատեք մեզ դրանից։ Վստահ ենք, որ մեր քաղաքացիները կմերժեն այս կեղտոտ խաղը։ Ակնկալում ենք Հայ Առաքելական սուրբ եկեղեցու հոգևորականության ծանրակշիռ միջամտությունը և իշխանության մեջ գտնվող պարկեշտ անձանց (եթե այդպիսիք դեռ մնացել են- Հ․Մ) ընդվզումը»,- եզրափակել է նա։
Մայիսի 29-ին Փաշինյանը հայտարարել էր, թե «հայկական եկեղեցիները չուլանոց, աղբավայր են դարձրել»։ Քննադատություններից հետո մայիսի 30-ին գրառումների շարք էր հրապարակել Հայ Առաքելական եկեղեցու ներկայացուցիչների դեմ, իսկ ավելի ուշ նշել, որ պետությունը պետք է մասնակից լինի կաթողիկոսի ընտրություններին:
