Ո՛չ Ադրբեջանի կողմից իրականացրած կրակոցների սադրանքներին ենք տրվելու, ո՛չ հայտարարություններին, խորհրդարանական ճեպազրույցների ժամանակ հայտարարել է ՔՊ քարտուղար Արթուր Հովհաննիսյանը։
Ըստ նրա՝ ՀՀ-ն իր քաղաքականությունը վարում է՝ ելնելով ՀՀ պետական շահից։
«Կախված իրավիճակից՝ լինում են տարբեր մոտեցումներ։ Եվ տարբեր սահմանային իրավիճակների սիմուլյացիան մեկնաբանել չեմ ուզում։ Մենք գնում են էսկալացիան հնարավորինս նվազեցնելու ճանապարհով»,- նշել է պատգամավորը։
Հովհաննիսյանի խոսքով՝ կան որոշ ուժեր, նաև՝ ՀՀ-ի ներսում, որոնք տանում են նրան, որ Հայաստանը ևս դառնա ապակառուցողական սադրող կողմ, որը փորձում է էսկալացիա հրահրել։
«Մենք շարունակելու ենք շարժվել խաղաղության մեր օրակարգով, Ադրբեջանին առաջարկել ենք քննությամբ պարզել՝ ո՞ր կողմն է այդ միջադեպերը հրահրում և ինչպե՞ս է դա տեղի ունենում, և աշխատել դրանց կանխման ուղղությամբ»,- ասել է նա։
Ադրբեջանի զինված ուժերի ստորաբաժանումները մայիսի 30-ին՝ ժամը 00:10-01:00-ն ընկած ժամանակահատվածում, կրակ էին բացել Սյունիքի մարզի Խոզնավար բնակավայրի ուղղությամբ, ինչի հետևանքով վնասվել էր բնակելի տան սանհանգույցը, խոցվել էր մեկ մանր եղջերավոր կենդանի։
Բաքուն մարտի 16-ից պարբերաբար հայտարարում է սահմանային իր դիրքերի ուղղությամբ կրակոցների մասին, որոնք հայկական կողմը հերքում է։ Նշվում է, որ ադրբեջանական կողմն է մի քանի անգամ խախտել հրադադարի ռեժիմը, մայիսի 29-ին ևս Ադրբեջանի ԶՈւ-ն կրակ էր բացել Խոզնավարի ուղղությամբ՝ վնասելով բնակելի տուն:
