ՀՀ վարչապետ Նիկոլ Փաշինյանը և Սլովակիայի վարչապետ Ռոբերտ Ֆիցոն այսօր Երևանում քննարկել են ռազմարդյունաբերության ոլորտում համագործակցության հնարավորությունները, տեղեկանում ենք կառավարության մամուլի ծառայությունից։
«Ես հավատացած եմ, որ բանակին անհրաժեշտ է ենթակառուցվածք, ոչ միայն զենք, ինչպես մենք անցյալում ենք տեսել»,- ընդգծել է Ֆիցոն:
Նա հավելել է, որ Սլովակիայի ռազմական բյուջեում ունեցած ֆինանսավորման հաշվին նախագծում են մի շարք ծրագրեր, օրինակ՝ հիվանդանոցների, ճանապարհների, կամուրջների վերակառուցում՝ երկակի օգտագործման նախագծերի շրջանակում։
Սլովակ գործընկերոջ հետ համատեղ հայտարարության ժամանակ Փաշինյանն ասել է, որ այդ ոլորտում տեսնում են որոշակի համագործակցության հնարավորություններ:
Նա նշել է, որ Հայաստան-Եվրամիություն հարաբերությունների համատեքստում շատ մեծ օրակարգ կա նաև էներգետիկ, մասնավորապես՝ միջուկային էներգիայի ոլորտում համագործակցության առումով: Փաշինյանի խոսքով՝ համագործակցության օրակարգերը շատ ընդգրկուն են, հետևաբար, դրանք մի քանի ուղղությամբ կենտրոնացնելու ծրագրեր կան։
«Հույս ունեմ և համոզված եմ, որ այս այցի արդյունքներով բոլոր այդ ուղղություններով կունենանք կոնկրետ օրակարգեր և նախագծեր»,- ասել է նա:
ՀՀ վարչապետը նաև շնորհակալություն է հայտնել գործընկերոջը վերջին տարիներին Հայաստանին տրամադրված աջակցության համար։
2024 թվականի հուլիսի 12-ին Հայաստանի ԱԺ-ն վավերացրել էր Հունաստանի հետ ռազմատեխնիկական համագործակցության ընդլայնման համաձայնագիրը, որը կնքել էր Հունաստանի պաշտպանության նախարարության հետ 2023 թվականի դեկտեմբերի 14-ին՝ Աթենքում։ Դենդիասը մարտին հայտարարել էր Հայաստանի, Հունաստանի, Ֆրանսիայի և Հնդկաստանի միջև պաշտպանության ոլորտում քառակողմ համագործակցության մասին:
