Ֆրանսիան հյուպատոսություն կբացի Սյունիքի մարզի Գորիս քաղաքում, ՀՀ ԱԳ նախարար Արարատ Միզոյանի հետ համատեղ մամուլի ասուլիսի ժամանակ հայտարարել է Ֆրանսիայի ԱԳ նախարար Ժան-Նոել Բարոն։
Ըստ նրա՝ շուտով տեղի կունենա Ապակենտրոնացված համագործակցության կոնֆերանսը, ինչը շատ կարևոր համագործակցություն է Հայաստանի և Ֆրանսիայի համար՝ երկու երկրների միջև։
«Սա նաև քաղաքական նշան է, որ սա տեղի է ունենում Սյունիքում»,- ասել է Բարոն։
Նա նշել է, որ Ֆրանսիայի և Հայաստանի ԱԳ նախարարություններն այսօր՝ մայիսի 26-ին, Մտադրությունների հռչակագիր են ստորագրել, բացի այդ՝ Նիսում հունիսի 9-ին տեղի կունենա Օվկիանոսների գագաթնաժողովը, COP 17-ը, Ֆրանկոֆոնիայի խաղերը, որը տեղի կունենա 2027 թվականին։
«Մենք կցանկանանք, որ ՀՀ-ն հյուրընկալի Եվրոպական քաղաքական համայնքի 8-րդ գագաթնաժողովը, որը հնարավոր դարձավ շնորհիվ ՀՀ և Ադրբեջանի իշխանությունների համաձայնությամբ»,- նշել է նա։
Բարոն նաև շեշտել է, որ Հայաստանը ֆրանսիական «Իդեմիա» ընկերությանն է վստահել կենսաչափական անձնագրերի թողարկումը։ «Սա վստահության նշան է, և այդ վստահնությունը փոխադարձ է»,- շեշտել է նախարարը։
Նա պատմել է, որ ֆրանսիական զարգացման գործակալությունն արդեն 26 միլիոն եվրոյի կանաչ պարտատոմսերի թողարկում է համաձայնեցրել, բացի այդ՝ «Պրոպ արկոն» մասնակցություն է ունենալու Ակբա բանկի կապիտալին։
«Բոլորովին վերջերս ԶՖԳ-ն ջրի և գյուղատնտեսության ոլորտում նոր համաձայնություն է ստորագրել, որը մոտ 100 միլիոն եվրո է վարկով կապահովվի»,- նշել է Բարոն։
Ֆրանսիացի պաշտոնյան նշել է, որ Ֆրանսիան միշտ պատրաստ կլինի աջակցել Հայաստանին ապահովել այնպիսի մի հարաբերություն, որը գնալով ավելի ու ավելի կառուցողական կլինի։
