Երևանը «Զանգեզուրի միջանցք» եզրույթ չի օգտագործում, այդ հարցի շուրջ քննարկումներ չկան, , «Թեհրանի երկխոսություն ֆորում 2025»-ի ժամանակ հայտարարել է ՀՀ անվտանգության խորհրդի քարտուղար Արմեն Գրիգորյանը, փոխանցում է IRNA-ն:
«Որևէ քննարկում այսպես կոչված՝ «միջանցքի» վերաբերյալ չկա, մենք անգամ այդ տերմինը չենք օգտագործում։ Խոսում ենք այն մասին, թե ինչպես կարելի է տարածաշրջանային կապերն ապաշրջափակել, տարածաշրջանում խաղաղություն և կայունություն հաստատել ու նպաստել զարգացմանը։ Ինչպես նշեց Իրանի նախագահ Մասուդ Փեզեշքիանը, տարածաշրջանային համագործակցությունը չափազանց կարևոր է, և մենք պետք է համատեղ ուժերով շարժվենք դեպի խաղաղության համաձայնագիր»,- ասել է ԱԽ քարտուղարը:
Նա շեշտել է, ՀՀ-ն ակտիվ աշխատում է տարածաշրջանում խաղաղության և կայունության հաստատման, փոխկախվածության մեծացման ուղղությամբ։
«Այս համատեքստում մեր առաջարկած «Խաղաղության խաչմերուկ» նախաձեռնությունը ծրագիր է, որը միտված է առկա փակուղիների վերացմանը և տնտեսական ենթակառուցվածքների ամրապնդման միջոցով տարածաշրջանային կապերի ու փոխկախվածության զարգացմանը»,- նշել է Գրիգորյանը։
Անդրադառնալով Թեհրանի և Երևանի միջև համագործակցության զարգացմանը՝ նա պնդել է, որ խոչընդոտներ չկան:
«Եթե կան ինչ-որ խոչընդոտներ, ապա դրանք հիմնականում բյուրոկրատիկ բնույթ են կրում, բայց, իրականում, մենք խոչընդոտ չենք տեսնում»,- ասել է պաշտոնյան:
Բաքուն մի քանի տարի է՝ Երևանից պահանջում է առանց մաքսային հսկողության ու անխոչընդոտ ճանապարհ, որը կկապի Նախիջևանն Ադրբեջանին: Ադրբեջանի նախագահ Իլհամ Ալիևը մի քանի անգամ պնդել է, թե «միջանցքը» պետք է ստեղծվի, և Ադրբեջանից մարդիկ և բեռները «պետք է անցնեն առանց որևէ ստուգման»։
Հայաստանի իշխանությունները բազմիցս հայտարարել են, որ Երևանի համար անընդունելի է տարածաշրջանում հաղորդակցությունների ապաշրջափակումը «միջանցքի տրամաբանությամբ»: Ապրիլին ՀՀ արտգործնախարար Արարատ Միրզոյանը հայտարարել էր, որ հայկական կողմի համար անընդունելի են Բաքվի դիրքորոշման մեջ պարունակվող արտատարածքային վերահսկողության և «միջանցքի» բաղադրիչները։ Միևնույն ժամանակ, Հայաստանն Ադրբեջանին առաջարկել էր ապաշրջափակել երկու երկրների երկաթուղային ենթակառուցվածքները, ինչպես նաև պարզեցնել երկու երկրների սահմանով բեռների անցման տարբերակը:
