Հայաստանի 1101 քաղաքացիների 30%-ը ՀՀ վարչապետ Նիկոլ Փաշինյանի նկատմամբ իմպիչմենթի գործընթաց սկսելու նախաձեռնությունն ընդհանրապես բացասական է համարել, լիովին դրական կարծիք ունի 21%-ը, հայտնել է GALLUP-ի Հայաստանում անդամ ընկերության ղեկավար Արամ Նավասարդյանը՝ ներկայացնելով ապրիլի 2-ից մայիսի 2-ն իրականացրած հարցման արդյունքները։
Նախաձեռնությունն ավելի շուտ դրական է գնահատել 17, ավելի շուտ բացասական՝ շուրջ 14%-ը։
Փաշինյանի հեռացման ամենաարդյունավետ միջոցը, ըստ հարցմանը մասնակցած քաղաքացիների 35,4%-ի, արտահերթ խորհրդարանական ընտրություններն են։ Նրանց 29,8%-ը նշել է հրաժարականի, 5%-ն՝ իմպիչմենթի, շուրջ 10%-ը՝ փողոցային ճնշման անհրաժեշտության մասին, իսկ 16,9%-ի կարծիքով՝ Փաշինյանը չպետք է հեռանա։
Քաղաքացիները պատասխանել են նաև հարցին, թե որ քաղաքական ուժին, թեկնածուին կընտրեին, եթե առաջիկա կիրակի օրը տեղի ունենային խորհրդարանական ընտրություններ։
Նրանց մեծամասնությունը՝ 23,7%-ը, նշել է, որ չէր մասնակցի ընտրություններին, 18,5%-ը դժվարացել է պատասխանել հարցին։ «Քաղաքացիական պայմանագիր» կուսակցության օգտին պատրաստ է քվեարկել 11,5%, «Հայաստան դաշինքի» և դաշինքի առաջնորդ, ՀՀ երկրորդ նախագահ Ռոբերտ Քոչարյանի օգտին՝ 8%։ ՀՀ երրորդ նախագահ Սերժ Սարգսյանի գլխավորած Հայաստանի Հանրապետական կուսակցության օգտին քաղաքացիների 3,7%-ն է պատրաստ քվեարկել, ԲՀԿ-ի՝ 3,2%-ը։
Առաջին հնգյակը եզրափակել է Վարդան Ղուկասյանի ղեկավարած ԴՕԿ կուսակցությունը՝ 2,9%-ով, 6-րդ տեղում ՀՅԴ-ն է՝ 2,2%-ով։ Ամենացածր՝ 0,3% ստացել է քաղաքագետ Լևոն Շիրինյանի Քրիստոնեա-Ժողովրդավարական կուսակցությունը։
Ապրիլի 28-ին «Արթուն ենք» շարժումը նամակներ էր փոխանցել ԱԺ պատգամավորներին՝ Փաշինյանին անվստահություն հայտնելու (իմպիչմենթ) գործընթացի առաջարկով։ ԱԺ անկախ պատգամավորներ Հովիկ Աղազարյանը, Հակոբ Ասլանյանն ու Գեղամ Նազարյանն Armenia Today-ին հայտնել էին, որ չեն մասնակցի Փաշինյանին անվստահություն հայտնելու գործընթացին։ «Հայաստան» դաշինքն առաջարկել էր իմփիչմենթի համար փողոցային ճնշում ապահովել։ Նախաձեռնության համահեղինակ Նարեկ Մալյանը տեղեկացրել էր, որ «Պատիվ ունեմ» խմբակցությունն առանց որևէ նախապայմանի իր 6 ստորագրությամբ կմասնակցի Փաշինյանի գործընթացին։
