Արցախցիների իրավունքների պաշտպանության խորհրդի անդամներն ընդունել են Արցախի նախագահ Սամվել Շահրամանյանի առաջարկը՝ հեռացնել «Ազատության» հրապարակում տեղադրված վրանը և տեղակայվել Արցախի ներկայացուցչությունում, այսօր կայացած մամուլի ասուլիսի ժամանակ հայտարարել է Արցախցիների իրավունքների պաշտպանության խորհրդի անդամ Նժդեհ Իսկանդարյանը։
Ըստ նրա՝ ապրիլի 30-ին նախատեսված կառավարության նիստի ժամանակ ոչ միան երկարաձգելու են 40+10 ծրագիրը, այլև ընդունելու են այն պահանջները, որոնք խորհուրդը ներկայացրել է կառավարությանը և պատրաստ է բարելավել։
«Մենք թղթի վրա ներկայացրել ենք բոլոր կետերը, որոնք, ըստ մեզ, բարելավման կարիք ունեն։ Առաջին հերթին՝ բնակարանային ծրագրի մասին կուզեմ խոսել»,- նշել է նա։
Իսկանդարյանը հայտարարել է, որ առաջիկա 10 օրվա ընթացքում Արցախցիների իրավունքների պաշտպանության խորհուրդը հանրությանը կներկայացնի կատարված աշխատանքները, որից հետո հայրենակիցները կգնահատեն աշխատանքն ու եթե կարիք լինի՝ նորից հանրահավաք կանցկացնեն։
«Մենք կաշկանդված չենք, և գնալու ենք այդ ճանապարհով»,- հայտարարել է Իսկանդարյանը։
Ապրիլի 25-ին Շահրամանյանն այցելել էր վրանում տեղակայված Արցախցիների իրավունքների պաշտպանության խորհուրդ։ Նա հայտարարել էր, որ նրանք իր կողմից ունեն լիակատար աջակցություն և առաջարկել էր ցանկության դեպքում տեղափոխվել Արցախի ներկայացուցչություն՝ գրասենյակային պայմաններում շարունակելու աշխատանքները։
